Një nga zërat më fuqishëm të mendimit intelektual në Hungari, Péter Nádas, është ndarë nga jeta këtë të mërkurë në banesën e tij në Gombosszeg. Lajmi për ndarjen e tij nga jeta në moshën 83-vjeçare u konfirmua nga agjentja e tij letrare, Anett Orosz, për mediat ndërkombëtare.
I konsideruar për dekada me radhë si një nga kandidatët kryesorë për çmimin “Nobel” në Letërsi, Nádas la pas një trashëgimi të pasur me romane, ese, drama dhe vepra fotografike që eksploruan me saktësi kirurgjike kujtesën, trupin, identitetin dhe traumat e historisë evropiane të shekullit të 20-të.
I lindur në Budapest në vitin 1942, Nádas e nisi karrierën e tij si gazetar dhe fotoreporter përpara se t’i përkushtohej tërësisht krijimtarisë letrare.
Karakteristika e tij kryesore letrare ishte vëzhgimi pedant, introspeksioni i thellë dhe stili i detajuar.
“Libri i Kujtimeve” (A Book of Memories, 1986) është vepra e tij më e njohur ndërkombëtarisht. Libri u cilësua nga kritiku dhe shkrimtarja e njohur amerikane Susan Sontag si “romani më i madh i shkruar në kohën tonë”.
Përveç letërsisë, vizioni i tij estetik u pasurua ndjeshëm nga përvoja e hershme si fotograf, duke i dhënë prozës së tij një qartësi pamore unike.
Ndarja nga jeta e Péter Nádas shënon humbjen e një prej zërave më origjinalë që arriti të lidhte me mjeshtëri përvojën individuale me dramën kolektive të Evropës Qendrore.
m.aleksi / dita
