Agjenti i Forcave Operacionale, Jeton Lami, i cili ndihmoi Ervis Martinajn të arratiset, ka dalë sot para Gjykatës Lezhë për të mësuar masën e sigurisë.
Arrestimi i Lamit u bë me dije një ditë më parë, pasi akuzohet se ka ndihmuar Ervis Martinaj të arratiset. Lami u zbulua pas hetimeve që po kryen policia për zhdukjen e Martinajt, pas denoncimit të familjarëve të Ervis Martinaj se kanë humbur prej disa kohësh çdo kontakt me të.
Sipas Policisë, Lami ka shpërdoruar detyrën duke përkrahur dhe transportuar një person shumë të kërkuar. Pra, Jeton Lami përveçse ka mbajtur kontakte me të shumëkërkuarin edhe është bërë shofer i tij duke e ndihmuar në arrati. Dëshmia e tij pritet të jetë kyçe për të zbuluar vendndodhjen e Ervis Martinajt.
Lami është kapur nga kamerat e sigurisë së një hoteli në Durrës, ku ka qenë i shoqëruar me Ervis Martinajn. Ai e ka shoqëruar Martinajn me makinë në datën 5 gusht 2022 dhe më pas është larguar për t’u kthyer një ditë më pas për ta marrë sërish nga hoteli. Martinaj është parë për herë të fundit në Tiranë dhe më pas ka humbur kontaktet. Kjo kohë përkon edhe me denoncimin e xhaxhait të Martinajt, i cili ka deklaruar se më 8 gusht ka humbur kontaktet me nipin.
a.m/dita
