Dosja hetimore që lidhet me marrëdhëniet e McGonigal me Shqipërinë, paraqet një zyrtar që në mënyrë aktive kërkon para nga shqiptario-amerikani i raportuar si Personi A, ndërsa udhëton në Shqipëri në mënyrë të përsëritur, udhëtime për të cilat, nuk paguan. Sipas aktakuzës [Link], “jo më vonë se gushti 2017-ës, i akuzuari McGonigal u takua me personin A dhe pyeti nëse Personi A mund t’i siguronte atij para”.
Më 5 shtator 2017, McGonigal i raportoi FBI-së se do të kryente një vizitë “jozyrtare” në Shqipëri. Hetuesit zbuluan më vonë se ai nuk kishte treguar se do të ishte në këtë vizitë nën shoqërinë e Personit A, se shpenzimet e udhëtimit nuk po paguheshin prej tij, se ai do të udhëtonte edhe në Kosovë dhe se ai do të takohej edhe me Personin B. Më 7 shtator, i akuzuari dhe Personi A diskutuan për paratë dhe ai i tha se do t’ia siguronte gradualisht.
Më 9 shtator ai takohet me kryeministrin Edi Rama dhe diskuton mes të tjerave edhe licenca kërkimi për naftë.
Më 5 tetor 2017, ai mori 80 mijë dollarë nga Personi A në Nju Jork. Dy pagesa të tjera prej 80 mijë dhe 65 mijë dollarë pasuan më vonë atë vjeshtë.
Në 16 tetor 2017, McGonigal njoftoi FBI-në për një udhëtim tjetër në Shqipëri, ku sërish nuk deklaroi se do të takohej me kryeministrin shqiptar. Ai gjithashtu nuk pagoi për udhëtimin. Se kush ia mbuloi shpenzimet, kjo mund të merret me mend, por nuk dihet.
Më 20 nëntor 2017, ai është në Shqipëri ku takohet me Ramën. Sërish, as ai dhe as FBI nuk paguan për hotel e për ushqime.
Më 25 nëntor 2017, McGonigal informon Departamentin e Drejtësisë për një hetim të ri potencial në lidhje me lobimin e një “partie politike të ndryshme nga ajo në të cilën kryeministri është pjesë”. Kjo është pjesa për të cilën, Partia Demokratike (grupi i Berishës) akuzon se ka të bëjë me të. Sipas PD-së, Rama korruptoi zyrtarin e FBI në mënyrë që ky i fundit të hetonte lobuesin e PD në SHBA.
Në dhjetor 2017, McGonigal, Personi A dhe zyrtarë të tjerë të qeverisë shqiptare, përfshirë kryeministrin Edi Rama, hëngrën darkë në Uashington D.C.
Në 22 janar 2018, McGonigal mori informacion “mbi një shtetas amerikan lobist” nga Personi A dhe ia kaloi këtë informacion një agjenti special në varësi të tij. Sipas aktakuzës, “Personi A e mori informacionin nga Zyra e Kryeministrit të Shqipërisë.”
Personi B ndihmoi në lehtësimin e hetimit të FBI-së, mes të tjerash, duke paguar shpenzimet e udhëtimit të një dëshmitari që u intervistua në Evropë.
Më 26 shkurt 2018, zyra e FBI në Nju Jork hapi zyrtarisht një hetim penal të fokusuar te lobisti amerikan me kërkesë të të akuzuarit McGonigal dhe nën udhëzimin e tij.
Në 4 Mars 2018, McGonigal pati një darkë e dytë në Uashington me Ramën, Personin A dhe zyrtarë të tjerë.
Rama nuk e pranon që të ketë ndikuar në këtë hetim. Mediat afër tij theksojnë ndërkohë faktin që “mund të ketë patur nxitje”, por fakti ekzistonte, pavarësisht Ramës. Pra marrja e parave ruse nga lobisti i PD-së, është reale, nuk është sajuar.
Pjesa më qesharake i takon sërish Berishës, sepse deri më tani në luftën e tij me Bashën, ka thënë të kundërtën, pra që Rama ndihmoi Bashën të mbyllte hetimin për fo det ruse.
Nga dosja McGonigal, del e kundërta. Por Berisha nuk përmbahet. Tani deklaron pa asnjë droje të kundërtën.
Një nga kritikët brenda PD, sociologu Ergys Mërtiri, shkruan për këtë:
“Skandali qe goditi Ramen, nxjerr zbuluar edhe Berishën. Ndersa ka nje vit e gjysem qe thote se Basha eshte i shitur tek Rama, tani na del se Rama paska blere kreun e FBI-se per te goditur Bashen. Ndersa ka deklaruar pa fund se Rama ia ka mbyllur Bashes dosjen e hetimit per parate ruse, tani na del qe, perkundrazi, Rama paska paguar per ta hapur kete dosje.
E nderkohe qe Rama e paguan me para njollosjen e PD-se me akuza te tilla, vete Berisha e ka bere falas kete sherbim, duke ngritur edhe nje komision hetimor qesharak brenda PD-se per hetuar parate ruse. Sot Berisha nuk ka kuraje as te kerkoje ndjese per rrenat banale mbi te cilat e ngriti revolucionin e vet te lodhur”.
