Nëse Kodin Rrugor nuk e respektojnë as zyrtarët, shtetarët apo edhe përfaqësuesit e politikës që aspirojnë të drejtojnë vendin, qofshin majtas apo djathtas, çfarë mund të presësh tek qytetarët e thjeshtë që posedojnë mjete motorike dhe bëhen burim aksidentesh? Ish-kandidati i PD-së për deputet në zgjedhjet e vitit 2021, Qani Xhafa, raportohet se është arrestuar në orët e para të mëngjesit të së shtunës, pasi është përfshirë në një aksident rrugor, lajmi për të cilin u mësua vetëm tre ditë më pas. Xhafa dyshohet se ka qenë në gjendje të dehur në momentin e ngjarjes, duke e përplasur edhe mjetin me barrierat e rrugës, po për fat të mirë pa shkaktuar të lënduar apo viktima. Aksidenti ka ndodhur në bulevardin “Qemal Stafa” në Elbasan. Mësohet se Qani Xhafa, i cili udhëtonte në gjendje të dehur, është përplasur me trafikndarësen në rrugë.
Pas aksidentit, Xhafa është arrestuar nga efektivët e policisë. Qani Xhafa kandidoi për PD-në në zgjedhjet e përgjithshme të vitit 2021, në qytetin e Elbasanit, ku ishte i renditur i 8-i në listë, pas Luçiano Boçit. Gjithashtu, Xhafa do të bëhet deputet së shpejti, pasi Luçiano Boçi do të lërë mandatin për shkak se do të garojë për kryetar bashkie në Elbasan, në zgjedhjet vendore të 14 majit.
