Gilberto Hernández, një mbrojtës për ekipin e futbollit panamez, vdiq në moshën 26-vjeçare pasi persona të armatosur hapën zjarr të dielën, kur ai ishte me një grup shokësh në një rrugë qendrore në Colón, një qytet port i dhunshëm në vendin e Amerikës Qendrore. Autoritetet njoftuan të hënën arrestimin e një të dyshuari.
Hernández është ndërkombëtari i dytë panamez që vritet në Colón në gjashtë vitet e fundit. Në vitin 2017, u qëllua për vdekje edhe mesfushori Amílcar Henríquez, i cili ishte pjesë e ekipit që kualifikoi vendin e tij për herë të parë në historinë e tij për Kupën e Botës 2018 në Rusi. Hernández u godit nga të shtënat nga dy burra të panjohur që dolën nga një taksi, sipas policisë dhe shtatë persona të tjerë u plagosën në sulm.
Hernández luajti për Club Atlético Independiente, kampion aktual i ligës profesionale të Panamasë. Ai luajti dy ndeshje me kombëtaren, e dyta ishte miqësorja kundër Argjentinës, kampione botërore, marsin e kaluar. Panamaja humbi 2-0 në Buenos Aires. Pas ndeshjes, ai dhe bashkëlojtarët e tjerë bënë foto me Leo Messin.
Manuel Arias, president i Federatës së Futbollit të Panamasë, shkroi në X, platforma e njohur më parë si Twitter, se Hernández ishte “një lojtar profesionist që humbi jetën sot, për fat të keq për shkak se ishte në vendin e gabuar në kohën e gabuar”. Ai shtoi se ishte një shembull i “dhunës që trondit shoqërinë tonë dhe që ne duhet ta luftojmë”.
Viktimat e dhunës në Kolon
Colón ndodhet 80 kilometra në veri të kryeqytetit të vendit, Panama City, ku anijet hyjnë dhe dalin nga Deti i Karaibeve përmes Kanalit të Panamasë. Provinca panameze e Kolonit, me një popullsi prej rreth 300,000 banorësh, regjistroi 102 vrasje vitin e kaluar, nëntë më pak se një vit më parë, sipas të dhënave të qeverisë. Autoritetet ia atribuojnë një pjesë të madhe të dhunës konkurrencës së trafikut të drogës.