Arrestimi i ish-punonjëses së Bankës së Shqipërisë, Milena Deraj, nxori në skenë emrin e një personi të kërkuar nga Policia e Shkodrës.
Në dosjen e Prokurorisë përveç veprimeve hetimore në lidhje me akuzat e ngritura ndaj 33-vjeçares Deraj, jepen detaje edhe në lidhje me personin në kërkim, Abedin Ferracaku, i njohur edhe me mbiemrin Verracaku.
Ai bashkë me dy vëllezërit e tij janë shpallur në kërkim në vitin 2021, si bashkëpunëtorë në masakrën e Velipojës, ku mbetën të vrarë 4 persona, mes të cilëve edhe një i ri kamarier, që u vra aksidentalisht në ditën e parë të punës.
E megjithëse është i kërkuar, Abedin Ferracaku, rezulton se lëviz i lirshëm në Shkodër madje ka udhëtuar disa herë edhe drejt Tiranës. Lëvizjet e tij janë rrëfyer nga e arrestuara Milena Deraj, por bëhen të besueshme pasi konfirmohen edhe nga deklarimet që i janë marrë kushërirës së tij.
Abedin Ferracaku nuk është i kërkuari i vetëm që sfidon Policinë.
Suel Çela prej disa vitesh ka qenë në kërkim për vepra të ndryshme penale nga Policia e Elbasanit. Kërkohej për përplasjen me Policinë tek tregu Agro-Ushqimor, por nuk u ndalua në asnjë moment.
Kjo nuk e pengonte që të firmoste prokura tek noteri dhe të kërkonte në gjykatë zëvendësimin e masës së arrestit. Të njëjtën gjë bën edhe tani. Madje ka shkuar deri në Gjykatën e Lartë. Nga ana tjetër gjithmonë ka pasur informacione për lëvizjet e tij, madje edhe jashtë vendit, por Policia asnjëherë nuk e ka ndaluar.
Së fundmi ai është në kërkim pas dëshmisë së Nuredin Dumanit, i cili pretendon se Suel Çela e ka porositur për dy vrasje.
Erjon Llapushi është një tjetër i kërkuar, i akuzuar për vrasje, që lëviz lirshëm në Tiranë dhe Pogradec ku ka vendbanimin.
Talo Çela, nga ana tjetër, një nga personat më të kërkuar në Shqipëri, vitin e kaluar i shpëtoi një atentati në Elbasan. Ndonëse Policia nuk e gjente për ta arrestuar, vrasësit dinin çdo lëvizje të tij. Ai i shpëtoi këtij atentati duke u kundërpërgjigjur me armë.
Por nuk e pati të njëjtin fat Fabian Gaxha që mbeti i vrarë gjatë konfliktit në ish-Bllok, në vitin 2018. Ngjarje ku u plagos edhe miku i tij, Ervis Martinaj.
Gaxha, rezultoi të ishte në kërkim për akuzën e vrasjes së mbetur në tentativë, megjithatë për së gjalli nuk ra kurrë në duart e Policisë.
Ibrahim Lici është një emër që u bë i njohur në Shkodër, por më pas bëmat e tij nisën të përhapen në të gjithë Shqipërinë. Për shumë kohë askush nuk dinte asgjë rreth të kërkuarit për vrasje. Ai sfidoi herë pas herë autoritetet shqiptare, madje edhe kur u mendua se Policia ra në gjurmët e tij në Turqi, u zhduk edhe atje.
Ervis Martinaj, është denoncuar i humbur nga familjarët, por deri tani asgjë nuk është provuar nga Policia dhe Prokuroria. Megjithatë deri më datë 9 gusht kur u denoncua i humbur, ai kishte lëvizur lirshëm edhe pse ishte shpallur në kërkim pas dëshmisë së Nuredin Dumanit.
Madje edhe ishte ndihmuar nga punonjës Policie, siç edhe rezultoi me arrestimin e efektivit Jeton Lami.
1 – Abedin Ferracaku 32 vjeç: I kërkuar në lidhje me masakrën në Velipojë
2 – Suel Çela 35 vjeç: I kërkuar nga SPAK me dyshimet se ka porositur vrasje
3 – Erjon Llapushi 32 vjeç: Një ndër personat më të kërkuar, i dyshuar për vrasje
4 – Talo Çela 51 vjeç: I kërkuar për grabitjen e Rinasit dhe vrasje, gjykohet në mungesë
5 – Ibrahim Lici 30 vjeç: I shpallur në kërkim ndërkombëtar për vrasje
6 – Ervis Martinaj: Rezulton i zhdukur, në kërkim nga SPAK për porositje vrasje
j.l./ dita
