Nga Migena Aleksi
Shtëpia e Bardhë priti një darkë shtetërore luksoze “me kravatë të zezë”, ku Presidenti i SHBA-së Donald Trump dhe udhëheqësi kinez Xi Jinping mblodhën më shumë se 130 të ftuar, përfshirë elitën e teknologjisë dhe financës.
Emra si Elon Musk, Jeff Bezos, Jensen Huang, Mark Zuckerberg, Sam Altman, Satya Nadella dhe Sundar Pichai ndanë tryezën me udhëheqësit kryesorë politikë të botës, ndërsa inteligjenca artificiale (IA) dhe gjysmëpërçuesit doli si tema kryesore e samitit.
Megjithatë, takimi shfaqi prapaskena të rëndësishme gjeopolitike dhe industriale.
Kompani kyçe si Anthropic (drejtuesi i së cilës, Dario Amodei, kërkon rregullime më të rrepta të IA-së), Palantir (gjigandi i teknologjisë mbrojtëse, bashkëthemeluesi i së cilës Peter Thiel ndodhej në Berlin), si dhe Intel, IBM e Oracle, mungonin nga lista e të ftuarve.
Mungesa ishte më e fortë nga Pekini. Ndryshe nga pritshmëritë, asnjë drejtues i korporatave kineze nuk mori pjesë; delegacioni i Xi-së përbëhej tërësisht nga zyrtarë të lartë shtetërorë.
Vizioni i ndryshëm për IA-në
Ndërsa Xi Jinping theksoi nevojën që IA të mbetet “nën kontrolin e njeriut”, Trump përsëriti qëndrimin e tij kundër rregullimeve frenuese, duke e cilësuar zhvillimin e “superinteligjencës” si përparësi absolute, ndonëse u diskutua një mekanizëm i përbashkët njoftimi për incidentet e mundshme.
Darka pasoi bisedimet 90-minutëshe që mbuluan gjithashtu tregtinë, Tajvanin dhe konfliktin në Iran, pas vendimit për zgjatjen e armëpushimit tregtar edhe me dy muaj të tjerë. Në dollinë e tij përmbyllëse, Trump nëvizoi se, me gjithë rivalitetin dhe “sistemet e ndryshme”, dy fuqitë mund të ndërtojnë një marrëdhënie që garanton prosperitet dhe siguri.
DITA
