Nga Dorin Xhima / DITA SPORT
Ryan Wedding ishte dikur një sportist snowboarder olimpik. Ai përfaqësoi Kanadanë në Lojërat e Dimrit 2002.
Sipas hetimeve të autoriteteve amerikane, ai më pas u përfshi në një rrjet shumë të madh trafiku të drogës që importonte kokainë nga Amerika Latine në Shtetet e Bashkuara dhe Kanada.
Akuzat përfshijnë: trafik droge në masë të madhe (sipas FBI-s, deri në 60 tonë në vit); vrasje dhe porosi për vrasje, përfshirë ekzekutimin e një dëshmitari federal.
Si rezultat, në vitin 2025 ai u fut zyrtarisht në listën e “10 të më të kërkuarve” nga FBI. Aktualisht Shtetet e Bashkuara ofrojnë shpërblim deri në 15 milionë dollarë për informacione që do të çojnë në kapjen e tij.
Çfarë e bën ky rast të veçantë është kontrasti mes asaj që ishte (sportist, fytyrë publike, përfaqësues kombëtar), dhe asaj që akuzohet se është bërë: Një trafikant i madh ndërkombëtar.
Po si ndodhi rrëshqitja e Ryan Wedding drejt krimit? Pas Olimpiadës, ai u përball me probleme financiare dhe me vështirësi për të mbajtur nivelin e jetës që kishte gjatë karrierës sportive.
Hetuesit thonë se ai filloi të përfshihej në aktivitete të dyshimta nëpërmjet kontakteve që krijoi në komunitetin e sporteve ekstreme dhe në botën e argëtimit. Kjo lloj bote shpesh është e lidhur ngushtë me profile aventuriere dhe rrjete informale ku qarkullojnë para të shpejta.
Ky lloj rrethi mendohet se ishte porta e tij hyrëse. Sipas FBI-së, rrëshqitja e tij ndodhi gradualisht: fillimisht u hetua se kishte lidhje me shpërndarës lokalë, më pas u dyshua se vepronte si ndërmjetës te rrjete më të mëdha. Në fund u identifikua si një nga organizatorët e trafikut të sasive të mëdha të kokainës.
FBI thotë se ai përdori njohjet ndërkombëtare (përfshirë udhëtimet e vjetra sportive) për të siguruar lidhjet e grupit. Pjesa më e rëndë e dosjes nisi kur, sipas dokumenteve gjyqësore Wedding dhe grupi i tij u përfshinë në ngjarje të dhunshme për të mbrojtur aktivitetet e tyre.
Ai akuzohet se porositi vrasjen e një personi që po bashkëpunonte me autoritetet. Kjo e shndërroi çështjen nga “trafik i rëndë” në “krim të organizuar me dhunë”. Në atë moment, ai u zhduk dhe nisi arratia. Pas zhdukjes, FBI dokumentoi se Wedding jeton me identitete të ndryshme. Në çdo hap, sipas autoriteteve, ai shkon më thellë dhe humbet më shumë lidhjen me jetën normale.
—
©️Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, sipas Nenit 178 të Ligjit Nr/ 35/2016
