Shkaqet më të zakonshme të dëmtimit kronik të veshkave janë presioni i lartë i gjakut i menaxhuar keq dhe diabeti i pakontrolluar. Mbajtja e nën kontroll e këtyre dy faktorëve redukton edhe ndërlikimet që mund të prekin veshkat.
Një shkak tjetër mjaft i shpeshtë i dëmtimit kronik të veshkave është edhe “veshka policistike”, e cila është një sëmundje gjenetike e trashëguar. Kjo karakterizohet nga prania e shumë cisteve në veshka që zëvendësojnë indin normal të veshkave dhe çojnë në zmadhimin e saj. Kjo situate mund të rezultojë në fund të fundit në sëmundje kronike të veshkave dhe në pamjaftueshmëri të punës së saj (dështimi i punës së veshkave ose insuficienca renale).
Për të parandaluar këtë gjë, është mjaft e rëndësishme që sëmundjet e veshkave akute, ose kronike të trajtohen sa më shpejt dhe në mënyrën e duhur për të mos kaluar në situatën e pakthyeshme të insuficiencës renale. Kjo është një situate mjaft e vështirë për jetën e njeriut pasi trajtimi i vetëm mbetet hemodializa.
Veshkat janë organe çift në formën e fasules të vendosura në zonën e belit dhe përkatësisht në dy anët e shtyllës kurrizore. Ato realizojnë filtrimin e gjakut duke eliminuar lëndët e panevojshme që përfitohen pas filtrimit, si edhe lëngjet e tepërta. Veshkat ruajnë gjithashtu bilancin e elektrolitëve (kripërave minerale) në organizmin tonë. Përveç kësaj, hormonet e prodhuara në veshka ndihmojnë në ruajtjen e presionit në kufijtë e normës që është rreth 120/80 mm Hg. I gjithë gjaku i trupit tonë kalon përmes tyre disa herë në ditë, filtrohet (pastrohet) dhe rikthehet i pastër përsëri në trup. Mbeturinat kthehen në urinë, e cila do të eliminohet jashtë organizmit tonë.
Çdo veshkë ka rreth një milion filtra të vegjël që quhen nefrone. Kjo është arsyeja që edhe kur punon vetëm 10 për qind e veshkave mund të mos vëmë re ndonjë simptomë, apo shenjë të dukshme klinike.
Nëse gjaku ndalon të rrjedhë në një veshkë atëherë ajo do të pësojë dëmtime të rënda dhe për të kompensuar punën e saj do të sforcohet veshka tjetër. Funksioni i veshkave i referohet gjendjes së veshkave dhe sa mirë e filtrojnë ato gjakun. Dy veshka të shëndetshme sigurojnë 100 për qind të funksionit të veshkave. Shpeshherë sëmundjet kronike të veshkave paraqiten me shenja klinike jo shumë specifike, domethënë që këto simptoma mund të jenë edhe shenja të mosfunksionimit të ndonjë organi tjetër të trupit, çka bën që të vonohet në kohë edhe vendosja e diagnozës së duhur.
p.k\dita
