Vdekja e një adoleshenti, i cili kaloi në overdozë pasi mori një sasi të madhe ilaçesh kundër alergjisë, për të realizuar një sfidë online, rikthen dhe njëherë alarmin për rreziqet që paraqesin për fëmijët tanë këto lojëra në rrjetet sociale.
13-vjeçari Jacob Stevens nga Columbus në Ohia piu më shumë se 12 pilula Benadryl, ndërkohë që shokët e tij filmonin se çfarë do të ndodhte me të.
Dhe në fakt trupi i tij pësoi kolaps pas disa minutash. Në pak orë, organet nisën të dilnin jashtë funksionit, teksa truri nuk po përgjigjej më.
Stevens ndërroi jetë 6 ditë më pas në spital.
Djali ishte viktima e tretë e sfidës ‘Benadryl Challenge’, një lojë vdekjeprurëse në TikTok që ka si synim të shkaktojë halucinacione.
Në vitin 2020 një tjetër 15 vjeçare në Oklahoma ndërroi jetë pasi po ashtu kishte konsumuar një numër të madh tabletash.
Një nga lojërat më të rrezikshme në internet është “Blackout Challenge”. Në këtë sfidë që zakonisht kryhet nga të rinjtë, pjesëmarrësit duhet të kufizojnë frymëmarrjen me rrip, litar apo sende të ngjashme derisa t’iu bjerë të fiktë.
Nga kjo lojë mendohet se kanë humbur jetën 80 persona që kur ajo nisi për herë të parë.
“Thyerësi i kafkës” është një tjetër sfidë, ku dy pjesëmarrës qëllimisht rrëzojnë një të tretë në tokë, i cili në pjesën më të madhe të kohë bie me kokë.
Edhe kjo lojë ka shkaktuar dhjetëra viktima, ndërkohë që për dy pjesëmarrës janë ngritur akuza për vrasje.
Një sfidë tjetër që po ashtu ka shkaktuar fatalitete është ajo e dehjes me dezinfektantë duarsh apo pirja e ilaçeve të gjumit për të parë se kush reziston më shumë zgjuar.
Për këto arsye, një alarm nga dhjetëra prindër ka shpërthyer në rrjetet sociale që bëjnë thirrje për më shumë kontroll ndaj fëmijëve në internet dhe rrjeteve sociale që ata ndjekin.
p.k. / dita
