Nis përzgjedhja e sallave të mëdha për zhvillimin e provimeve të Maturës Shtetërore 2023. Sikundër është edhe deklaruar më herët nga autoritetet e arsimit, provimet e këtij viti, do të zhvillohen në ambiente të mëdha, të cilat do të jenë të mbikëqyrura edhe nga kamerat, e jo më nëpër klasat e shkollave. Kjo me qëllim për të shmangur rrjedhjen e informacionit, apo kopjet, problematika të cilat janë konstatuar në masë gjatë viteve të shkuara.
Drejtoria e Përgjithshme të Arsimit Parauniversitar bën me dije se tashmë të zyrat arsimore në vend po bashkëpunojnë me pushtetin vendor, për të përcaktuar hollet, sallat e mëdha të pallateve të sporteve, të pallateve të kulturës, apo edhe teatrove, të cilat do të përdoren për zhvillimin e provimeve të Maturës Shtetërore 2023.
Autoritetet e arsimit sqarojnë se këtë vit numri i qendrave të provimit do të jetë 15 për qind më pak se një vit më parë, kjo për shkak të marrjes së vendimit për zhvillimin e tyre në salla më të mëdha. Ndërkohë që procesi i administrimit do t’u besohet rreth 7 mijë mësuesve.
p.k\dita
