Partia Demokratike e drejtuar nga Sali Berisha mban sot para Kryeministrisë një protestë. Nga Kuvendi ish- kryeministri foli për skenare ndërsa tha se me këtë protestë inagurohet procesi i largimit të Edi Ramës dhe protestat do të vazhdojnë derisa të finalizohet ky qëllim.
“Protesta ka skenarin e vet. E rëndësishme është që ne të japim mesazhin tonë të fuqishëm se shqiptarët nuk do ta tolerojnë më këtë regjim”, tha Berisha.
Në një kohë kur Berisha flet për skenarë, ambasadorja e SHBA-së, Yuri Kim ka reaguar, duke thënë se është shumë e rëndësishme që ajo të jetë paqësore dhe të respektohet ligji.
Protesta e paralajmëruar do të nisë në orën në orën 19:00 dhe do të përfundojë në orën 21:00, ndërsa për të ruajtur rendin dhe sigurinë në terren pritet të jenë rreth 1000 forca sigurie. Në gatishmëri do të qëndrojnë autobotët me ujë për shpërndarjen e turmave si dhe njësi nga shërbimi zjarrfikës dhe shëndetësor. Ndërsa gjatë ditës së sotme godina e Parlamentit është pajisur me prozhektorë të mëdhenj dhe megafonë të cilët janë montuar paradite nga punonjësit e Kuvendit.
Në kuadër të protestës disa segmente rrugore janë bllokuar.
Segmentet rrugore që janë të bllokuara
Bulevardi “Dëshmorët e Kombit”
Rruga “Gjergj Fishta”
Bulevardi “Bajram Curri”
Bulevardi Zhan D’Ark
a.m/dita
