Nis gara për 300 vendet e Akademisë së Sigurisë së Policisë. Në Pallatin e Kongreseve, u mbajt testimi për aplikantët që duan të bëhen efektivë. Ministri i Brendshëm, Bledi Çuçi, ka publikuar pamjet nga salla e testimit në Pallatin e Kongreseve, teksa shkruan se 714 aplikantë konkurrojnë për 300 vende vakante në Policinë e Shtetit. Gara monitorohet nga specialistë të Policisë së Shtetit dhe me një komision të përzgjedhur që do të kryej korrigjimin e testeve në mënyrë automatike.
“I gjithë procesi monitorohet nga kamerat dhe korrigjimi i testit do të bëhet me ‘Scandron’, në prezencë të vetë aplikantëve, për të garantuar transparencë maksimale”, thotë Çuçi.
Më tej Ministri i Brendshëm thekson se këto vite në Policinë e Shtetit janë afruar rreth 3 mijë të rinj, duke ulur ndjeshëm moshën mesatare të efektivëve.
“Do ta ruajmë këtë trend dhe do të ecim me shpejtësi në këtë korsi, për të arritur te mesatarja e vendeve të BE-së, si dhe do të vijojmë rrugën e pakthyeshme për të modernizuar më tej Policinë e Shtetit përmes investimeve në teknologji. Kapacitetet dhe profesionalizmi i punonjësve të Policisë do të barazohet me atë të partnerëve tanë europianë”, përfundon reagimin e tij ministri Çuçi.
Një tjetër risi e këtij procesi është nxjerrja e rezultateve në kohë rekord nga momenti i testimit dhe më tej verifikimi i të gjitha ankesave që kanë kandidatët që nuk shpallen fitues. Ata që do të marrin pikët maksimale do të kalojnë më tej edhe për shkollën e policisë dhe Patrullë të Përgjithshme.
