Një “blender” u ble 2 milionë e 700 mijë lekë, si u abuzua me çmimet e pajisjeve në tenderin e Universitetit Bujqësor

Të tjera detaje kanë nga tenderi abuziv në Universitetin Bujqësor të Kamzës, për të cilin u arrestuan sot 4 punonjës.

Policia vuri në pranga Ali Rashën, Ahmet Mejdanin, Tahir Ballgjinin dhe Rushit Sunan, pasi Prokuroria i akuzon për abuzim me një tender që shkon në vlerën 10.5 milionë lekë.

Një nga pajisjet që është regjistruar si e blerë mbi vlerën e çmimit në treg, në dosjen e Prokurorisë rezulton të jetë një Blender.

Kostoja normale e kësaj pajisje elektro-shtëpiake në treg do të shkonte në jo më shumë se 30.000 lek të rinj, por sipas hetimit rezulton se letrat janë “kopsitur” nga katër punonjësit e UBT-së duke e blerë për 276.000 mijë lekë të rinj.

Ndërkohë, një tjetër pajisje e blerë mbi vlerën reale të tregut është një frigorifer me ngrirje i markës “Beko”, që kushton 30.000 mijë lekë të rinj, por në UBT është blerë me shifrën rekord të 108.800 lekë të reja.

Gjithashtu në listën e shërbimeve ekstra, mund të kuptohet shumë lehtë se punonjësit e UBT kanë tejkaluar çdo lloj limiti dhe norme në blerjet që kanë realizuar, duke dysfishuar pothuajse vlerën e çdo pajisje.

Aty përfshihet edhe emri i Rektorit dhe shefes së financës që firmos listën, por që nuk kanë lidhje me shërbimin ku është kryer abuzimi, pasi gjithçka ka ndodhur në sektorin ku nuk përfshihet stafi akademik.

Këtë detaj e ka sqaruar në deklaratën për mediat edhe Prokuroria e Tiranës, që nënvizon se drejtori i Fermës Didaktike në UBT, Ali Rasha e ka përdorur shpeshherë emrin e rektorit në bisedat me personin që ka bërë kallëzimin për çështjen, si formë mbrojtje në skemën e abuzimit financiar.

“Sipas fletëhyrjes në magazinë, vlera e mallit ishte 10.5 milionë. Kallëzuesi në mirëbesim ka nënshkruar fletëhyrjen dhe ka deklaruar se malli për shumën 3.7 milionë lekë nuk është bërë asnjëherë hyrje në magazinë dhe nga kjo shumë, kallëzuesi, po në mirëbesim, ka nënshkruar një fletëdalje për shumën e mallit 1.958.500 lekë. Dalja për këtë vlerë malli, sipas kallëzuesit është bërë nën trysninë e vazhdueshme të shtetasit A.R. Kallëzuesi nga fundi i muajit Dhjetor të vitit 2021 ka tentuar shumë herë të komunikojë me A.R. dhe persona të tjerë duke përfshirë dhe Rektorin e Universitetit Bujqësor Kamëz, emrin e të cilit sipas kallëzuesit, e ka përdorur shpesh A.R., si mbrojtje për situatën e krijuar dhe për mungesën e mallit në magazinë, për hyrjen dhe daljen fiktive të mallit”, nënvizohet në deklaratën e Prokurorisë.

Por, pavarësisht kësaj rektori i Universitet Bujqësor dhe operatori ekonomik janë marrë në pyetje për të dhënë shpjegime për përfshirjen e tyre në këtë çështje.

o.j/dita