“Një çmenduri! Është një çmenduri”! Ahmetaj nxjerr nga arratia dokumentet për Smart City: 15 mijë dollarë një kamera trupi, 52 mijë dollarë një kamerë rruge (!)

Në intervistën e mbrëmshme televizive, ish-zëvendëskryeministri Arben Ahmetaj ka folur edhe mbi projektin “Smart City”, i cili synon vendosjen e mijëra kamerave të sigurisë dhe monitorimit në të gjithë vendin. Ai tha se shuma fillestare prej rreth 60 milionë dollarësh është rritur në 140 milionë dollarë (!) Dhe se për këtë ekziston një bisedë e përgjuar.

Ahmetaj nxjerr shembuj shqetësues të kostos: një kamerë trupi për policinë do t’i kushtojë vendit rreth 15,723 dollarë, ndërsa një kamerë për monitorimin e trafikut deri në 52,000 dollarë! Këto çmime janë 6–7 herë më të shtrenjta se çmimet në treg të kamerave. Kanë kushtuar shumë më pak edhe për kryeqytetet më të pasura të Europës.

Pjesë nga intervista

Arben Ahmetaj: Çfarë do Gys Agasi në Abu Dhabi dhe në Davos me Kryeministrin? E ka shumë të thjeshtë SPAK-u. Mjafton në qelizat e celularit, të shofi që Rama më shumë ka qëndruar me Gys Agasin sesa ka qëndruar me ndonjë ministër, përveç plaçkitëses (e ka fjalën për Ballukun – shën.red.)

Tani, në raport me Smart City-n. Po u them shqiptarëve që ka një debat të regjistruar. Ka shumë mundësi që SPAK ta ketë. Midis një ish-ministri të brendshëm dhe Gys Agasit për projektin e Smart City-t. Kanë qenë bashkë në Abu Dhabi, për kompaninë, për përzgjedhjen.

E para, shumën kreu i organizatës e ka çuar vetë. Filloi me 60, ky e ka çuar 140. Milionë dollarë, e kuptoni?! Janë kredi nga Abu Dhabi. Me 4 përqind. Dhe iu dhanë një kompanie të Abu Dhabit!  Dhe ju dhanë pa tender!

Shihni kostot! Janë 5.000 gati, 5.000 kamera të shtyllëzuara, 3.816 kamera trupi. Kamerat e trupit, me atë shtesë që është bërë, që ta dinë shqiptarët, dalin me 15.723 dollarë një kamerë!

Intervistuesi: Një kamerë trupi 15.000 dollarë?

Arben Ahmetaj: Po more! Një çmenduri. Pra shqiptarët paguajnë 15.723 dollarë për një kamerë trupi. Çmenduri. Një çmenduri po të them.

Dhe ka dy elementë të tjerë këtu. E mbani mend që policia dikur pati kamera trupi? Në numër shumë herë më të madh? Vetëm 5.7 milionë euro kushtoi atëherë. Në kohët e Tahirit flasim. Vetëm 5.7 milionë euro.

Dhe mos harroni që ka dhënë 70 milionë dollarë Banka Botërore për monitorimin e trafikut. Dhe mos harroni që edhe çdo Bashki ka investuar tek Smart Safe Cities.

Atëherë pse para të tjera? Për çfarë e bën këtë projekt? Për çfarë? Kujt do t’ia japi? Ku shkojnë, ku shkojnë paratë? E hoqi atë zv.ministrin, e dhunoi. Se kështu i përdor dhe mirë ua bën. (e ka fjalën për zv.ministrin e brendshëm të shkarkuar pak kohë më parë, biseda e nervozuar në telefon me të cilin e Ramës rrugëve të Romës u bë virale në internet – shën.red)

Intervistuesi: Kush ka firmosur për këtë tani?

Arben Ahmetaj: Xhemal Qefalia që e emëroi zëvendësministër.

Por shikoni edhe këtë (tregon dokumenta) se është e bukur kjo. Policia edhe tani vëzhgon gjithçka. Është një dokument i 18 maj 2022. Shikoni një çikë. Janë shpenzuar 800.000 euro. Për të lidhur me policinë sistemet e kamerave të bizneseve. Pra janë të lidhur. Për çfarë i harxhon këto para prapë ky për kamera të tjera nga buxheti i shtetit? Prapë e prapë e prapë e prapë?

Ju thashë çmimin për kamerë trupi. Shikoni çmendurinë tjetër (tregon dokumentet) 52.200 euro te Smart City për një kamerë tek monitorimi i rrugëve.

Intervistuesi: 52.000 euro vetëm një?

Arben Ahmetaj: E 200. Vetëm një kamerë, kaq, duke përfshirë lidhjen me sistemin. 52.000 për një kamerë shtylle paguajnë shqiptarët. 52.000 në njërën anë, 15.000 për një kamerë trupi në anën tjetër. E kam thënë, te AKSHI, janë shtatëfish kostot. Shtatëfish.

Shikoje këtu (tregon dokument doganor) Okej. Ja ku e ke. Është marrë në sistemin doganor. Në 10 vitet e fundit, janë importuar, 50 milionë euro sisteme të ngjashme. Ja sasia për këtë shumë. Janë 1 milion pajisje dhe sisteme sigurie.

Pra 1 milion pajisje, kanë kushtuar 50 milionë euro. Ndërkohë z.Rama po ble rreth 800 pajisje për 140 milionë dollarë!

Këto janë fakte. Nuk janë sajesa, janë nga sistemi doganor. Ja ku e ke. Që të mos përsërisim. Në 10 vitet e fundit, janë 1 milion pajisje dhe sisteme sigurie të cilat kanë kushtuar te 50 milionë euro.

Dhe kur ky del e thotë që është bërë një punë spektakolare. Projektet e veta ky, pra ato që i ka qejf vetë, që i shkojnë afër vetes, i çon aty ku do ky. Sigurisht pa tender.

Veç shumës katastrofë, ka një shqetësim tjetër. Ta ndajmë me qytetarët. Të dhënat tona, deri në retinën e syve, pa folur për targat, etj si mund t’i ketë një vend jashtë NATO-s? Nuk kam asgjë me vendet e Gjirit, i respektoj shumë. Por infrastrukturën kritike siç janë të dhënat personale, nuk mund ta ketë një kompani jashtë NATO-s. Janë të dhënat e shqiptarëve. Këto të dhëna janë pasuri.

Pra, kostot, realisht mbi 6-7 herë tregu. E dyta, infrastrukturë kritike.

U them specialistëve dhe atyre që merren me sigurinë kombëtare, shihni pak edhe teknologjinë këtu, se mund të jetë hostile. Armiqësore. Specialistët e sigurisë e kuptojnë shumë mirë çfarë jam duke thlnë. Mund të mos jetë, unë dua të mos jetë kështu. Por unë nuk e dua infrastrukturën kritike në këto duar. Megjithëse, po të isha cinik, do të thosha, më mirë në duart e kompanive arabe sesa në duart e kriminelëve siç janë sot.

o.p. / dita