Një demonstrim i pastër cinizmi dhe arrogance kundër publikes që përfaqëson

Nga Orgen Peci

Nga të gjitha rastet e dokumentuara ndërkombëtarisht, nuk rezulton asnjë shembull i krahasueshëm në botën demokratike ku një qeveri dhe një kryeministër të jenë përfshirë kaq hapur, kaq brutalisht dhe me paratë e taksapaguesve në shpëtimin, financimin dhe promovimin e një koncerti individual dhe komercial.

Kryeministri Edi Rama ka pritur në takim në ambientet e Kryeministrisë reperin kontrovers amerikan, Kanye West. Përmes një postimi në rrjetet sociale, Rama ka publikuar pamje nga takimi.ai i ka treguar reperit ambientet e brendshme të Kryeministrisë dhe pikturat që ndodhen atje.

Gjithashtu, Rama i ka dhuruar Kanye West librin “Albanian Files”, një ironi kjo ndaj akuzave për këtë libër.

Rama e ka shoqëruar postimin në rrjetet sociale më këngë të Kanye West, si dhe me 5 yje sipër videos, duke ironizuar kështu aksionin online të kryer nga protestuesit kundër bizneseve të lidhura me qeverinë dhe akuzat për abuzime me fondet publike.

Sjellja e kryeministrit është një demonstrim i pastër cinizmi dhe arrogance institucionale. Në kulmin e një revolte qytetare ai firmosi kalimin e 4.25 milionë eurove nga fondet e emergjencave kombëtare për të shpëtuar dhe financuar një koncert privat që dështoi me shitjen e biletave.

Ky vendim “flakë për flakë” përbën një akt lufte të hapur ndaj qytetarëve që mbushin bulevardet, duke përdhunuar vetë thelbin e kauzës së tyre, mbrojtjen e publikes nga plaçkitja dhe interesat private.

Për më tepër, ky rast përbën një precedent ndërkombëtar të frikshëm. Edhe pse kushtet e marrëveshjes mbahen të fshehura nga syri i publikut, nuk rezulton asnjë shembull i krahasueshëm në botën demokratike ku një qeveri përfshihet kaq hapur në shpëtimin financiar të një aktiviteti komercial individual.

Mund të jesh fare mirë edhe mbështetës i qeverisë, por është e pamundur të jesh dakord që 4.25 milionë euro të fondeveve të emergjencës të shkojnë për xhepat e një koncerti privat, në vend që të përdoren për zëvendësimin e skanerave që nuk punojnë në spitalet publike apo pajisje antizjarr etj etj. Lista është e pafundme.

​Në vend të llogaridhënies apo reflektimit, kryeministri zgjodhi edhe ta thellojë efektin në këtë grabitje publike, përmes dhurimit të librit të tij të kontestuar “Albanian Files” (një shaka private me një të huaj që nuk kupton kontekstin vendas) dhe postimit të videos me “5 yje” në rrjetet sociale.

Me këtë sjellje, Kryeministria ka braktisur përfundimisht petkun e një institucioni neutral dhe publik, duke u rreshtuar hapur si “troll” digjital dhe palë aktive në luftën e llogoreve kundër popullit të vet.

DITA