Nga Johana Lubonja
Botuar në DITA
Kjo është një foto e rrallë e Ramiz Alisë në burg, botuar nga DITA në 2016.
Për ata që e kanë harruar dhe për brezin e ri të paditur, Ramiz Alisë dhe disa zyrtarëve të lartë të ish-regjimit komunist iu bë një proces farsë, ku u ngrit akuza “për shpërdorim të fondeve shtetërore”.
Alia u vendos në arrest shtëpie në gusht 1992 dhe u arrestua zyrtarisht në shtator 1993. Në maj 1994 ai doli në gjyq dhe mori fillimisht një dënim 9-vjeçar.
Gjykata e Apelit ia reduktoi në kohë rekord dënimin në 5 vjet. Më 30 nëntor, Gjykata e Kasacionit e reduktoi me të njëjtën urgjencë dënimin edhe me tre vite të tjera.
Përfundimisht më 7 korrik 1995, Ramiz Alia u lirua. Një dënim i dytë u ndërpre pas trazirave të marsit 1997 dhe më pas “amnistohet për shkak të moshës”.
Vdiq më 7 tetor 2011 në Tiranë nga një komplikacion në mushkëri në moshën 86 vjeçare. U varros me homazhe shtetërore, të cilat u zhvilluan në Shtëpinë Qendrore të Ushtrisë, që sot shërben si selia e Partisë Demokratike.
Jemi në dhjetor. Koha për të kujtuar që proceset gjyqësore qesharake për Ramizin, Nexhmijen etj janë një nga provat e teatrit të “rrëzimit të diktaturës” në dhjetor 90 në Shqipëri.
Kjo jo vetëm për të thënë që “antikomunistët” që erdhën pas dhe që vazhdojnë të mbajnë për gryke Shqipërinë ishin hipokritë qesharakë të telekomanduar nga vetë regjimi.
Por edhe për të shtuar se këta karagjozë parapolitikë e dëshmuan veten dështakë, krejtësisht të paaftë për të zhvilluar vendin, thellësisht hajdutë e të korruptuar; duke e katandisur një nga vendet më të avantazhuara në raportin resurse natyrore – frymë, popullsi, në vendin më të varfër e më të telendisur të Europës ish-komuniste.
——
©Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
