Ndër vite, Top Channel ka treguar raste të përsëritura të nxënësve qoftë në shkolla 9-vjeçare apo gjimnaze të cilët shfrytëzonin pushimin e gjatë apo linin orët e mësimit për të konsumuar substanca të ndryshme narkotike, kryesisht cannabis sativa.
Së fundmi, për mes një bashkëpunimi të Policisë së Shtetit dhe Ministrisë së arsimit janë goditur grupe kriminale të cilat kishin shtrirë tentakulat pranë shkollave.
“Më këputet shpirti. Si nuk shqetësohem. Se janë të vegjël, të njomë, e pinë fshehurazi”, tha një gjyshe.
“Po thjesht fare, ja i fusin duart këtu te kangjellat e ua japin, ose aty te pema”, tregon ajo.
Nga shtimi i masave në shkolla përmes paketës së sigurisë, nxënësit që kanë krijuar varësi prej substancave narkotike po përpiqen të mos dalin hapur në konsumimin e tyre.
Megjithatë, ata i gjen të pranishëm në qoshet e institucioneve arsimore…
“Unë them mos pini se nuk bën mirë. Kam pasur shokë që e konsumojnë, por u largova se s’doja të futesha në rrugë të keqe”, u shpreh ajo.
Parandalimi i kriminalitetit këtë vit të ri mësimor nuk synohet të përqendrohet vetëm brenda ambienteve të rrethuar të shkollës, por edhe jashtë saj.
