Një gol shuan ëndrrën historike

Dorin Xhima – DITA

Kosova u mund minimalisht nga Turqia dhe mbeti jashtë Botërorit pas një mbrëmje historike për futbollin shqiptar.

Ëndrra për një kualifikim të parë në Kupën e Botës u ndal në prag në stadiumin “Fadil Vokrri”, në finalen e play-off-it. Ishte ndeshje e luftuar fort nga dardanët, por vendosi një moment.

Pjesa e parë foli për një Kosovë të guximshme dhe të organizuar, që nuk u tremb përballë një kundërshtari më me përvojë. “Dardanët” krijuan disa raste të pastra, ku më i rrezikshmi ishte ai i Fisnik Asllanit, goditja e të cilit u ndal nga traversa. Edhe Vedat Muriqi provoi të zhbllokonte sfidën, por pa sukses.

Turqia, nga ana tjetër, u tregua cinike dhe e duruar, duke pritur momentin e saj. Ai erdhi në fillimin e pjesës së dytë kur ndodhi goli që ndryshoi gjithçka

Në minutën e 53-54, një aksion i shpejtë nga krahu i djathtë, i nisur nga Kenan Yildiz, u finalizua nga Kerem Aktürkoğlu, i cili mposhti portierin e Kosovës dhe i dha avantazhin Turqisë.

Ky gol rezultoi vendimtar sepse megjithëse pati presion deri në fund, fati nuk i dha Kosovës shpërblim

Ekipi reagoi dhe hodhi të gjitha forcat në sulm. Stadiumit “Fadil Vokrri” iu rikthye zëri dhe besimi, ndërsa vendasit kërkuan me ngulm barazimin.

Rastet nuk munguan, por mungoi konkretizimi në momentin final. Turqia u mbrojt me disiplinë, duke menaxhuar avantazhin deri në vërshëllimën e fundit.

Kosova ishte vetëm një hap larg një arritjeje historike kualifikimit të parë në një Kupë Bote. Vetëm pak ditë më parë, skuadra kishte mahnitur me fitoren dramatike 4-3 ndaj Sllovakisë, duke ndezur entuziazmin e një kombi të tërë. Por përballë një Turqie më pragmatike, kjo ëndërr u ndal në 90 minuta vendimtare.

Pavarësisht zhgënjimit, kjo fushatë mbetet ndër më të suksesshmet në historinë e Kosovës. Një skuadër e re, që deri pak vite më parë nuk ekzistonte në hartën e futbollit botëror, arriti të jetë vetëm një hap larg Botërorit.

Ndoshta kjo e bën këtë humbje edhe më të rëndë, por njëkohësisht edhe më domethënëse për të ardhmen. Fundi i një ëndrre, por jo i një rrugëtimi.