Policia e Shtetit ka hasur në rezistencë nga banorët brenda kampit MEK, gjatë kontrollit pas një urdhri nga Gjykata e Posaçme.
Zëdhënësi i shtypit të kampit Ashraf, Shahriar Kia pretendon se njëri prej banorëve është vrarë, ndërsa 36 janë plagosur.
Bëhet fjalë për Ali Mostashari.
Lajmi ende nuk është konfirmuar nga Policia e Shtetit.
“Policia po vret muxhahedinët”, bërtasin ata, ndërkohë që Policia e Shtetit ka formuar një kordon para tyre, ndërsa ka marrë masa për të shmangur përshallëzimin e situatës.
Drejtori i shtypit në Ashraf, Shahriar Kia tha: Një banor i Ashrafit u vra nga sulmi i policisë. Ky veprim është vetëm për të qetësuar mullahët iranianë që po bien. Ky aksion është i ngjashëm me atë të 17 qershorit që u zhvillua në Paris, por ky është në kufirin e Shqipërisë. Ky është një nga ditët më të zeza në Shqipëri. Ajo që ju shkrova nuk është qëndrimi zyrtar i autoriteteve të Ashrafit, por ajo që thonë banorët e Ashrafit.
Edhe një nga banorët e kampit në një deklaratë për mediat shprehet se një nga banorët është vrarë nga forcat e policisë shqiptare.
Ndër të tjera ai thekson se vrasja është bërë me gaz dhe me goditje nga ana e policisë.
“Policia shqiptare ka vrarë një nga vëllezërit tanë, ato kanë përdorur gaz ose goditje me armë. Ai ishte vrarë, po bëjnë një hedhje gazi dhe po godasin. Akoma është brenda dhe nuk na lejojnë që të bëjmë asnjë veprim, ne muxhahedinët nuk jemi kriminele por jemi opozitë. Në mëngjes pa asnjë paralajmërim janë futur brenda kampi tonë, çfarë kemi bërë ne që ato vijnë dhe futen”, ka thënë një dëshmitar.
Sipas informacioneve, ka tensione në hyrje të kampit, ku anëtarë të MEK po protestojnë ndaj situatës së krijuar brenda kampit nga kontrollet policore dhe humbja e jetës së njërit prej tyre.
Sot Policia e Shtetit dhe Antiterrori po ekzekutonin një urdhër kontrolli të lëshuar nga Gjykata e Posaçme në ambientet e kampit MEK në Manzë të Durrësit.
Burime policore bëjnë me dije se urdhri i kontrolleve është në kuadër të luftës kundër terrorizmit dhe për parandalimin e sulmeve kibernetike.
Shumë nga banorët e kampit, ku strehohet opozita iraniane janë shoqëruar dhe janë marrë në pyetje dhe janë kthyer sërish në kamp.
j.l./ dita
