Nga Migena Aleksi
Prokuroria e Posaçme (SPAK) ka konfirmuar zyrtarisht përmes një shkrese të 6 nëntorit – të firmosur nga drejtuesi Klodjan Braho – se ka regjistruar procedimin penal nr. 97 lidhur me projektet e diskutueshme turistike në Zvërnec, Rrjoll dhe Divjakë-Karavasta.
Kallëzimi, i dorëzuar më 12 gusht nga një grup ekspertësh dhe protestuesish, mbështetet te gjetjet e “The Albanian Files” dhe “Dosjet e KKT-së”, duke denoncuar një model të përsëritur ku ndryshohen ligjet, miratohen instrumente të posaçme dhe jepen leje përmes Këshillit Kombëtar të Territorit, të kryesuar nga vetë kryeministri Edi Rama.
Në fokus të kallëzimit për vepra penale si shpërdorimi i detyrës apo grupi i strukturuar kriminal janë raste të bujshme si resorti “Blue Borgo” në Baks-Rrjoll (lidhja e të cilit me statusin e investitorit strategjik kontestohet), masterplani “Kingscoast” brenda parkut të Divjakë-Karavastasë, apo zhvillimet në Zvërnec përmes kompanive offshore me pronarë të fshehur.
Megjithatë, regjistrimi i procedimit penal në këtë fazë nuk garanton një kthesë të fortë ndëshkimore. Deri më tani, as kryeministri Edi Rama dhe as ndonjë prej funksionarëve apo biznesmenëve të përmendur nuk rezulton të jetë regjistruar nominalisht si person nën hetim apo si i pandehur.
Kjo lë të hapur pikëpyetjen nëse “Albanian Files” do të kalojë nga një hetim mbi faktin te përgjegjësitë e mirëfillta penale të individëve, apo do t’i bashkohet listës së gjatë të dosjeve pa emra në SPAK, të cilat shpesh përdoren më shumë si alibi për të krijuar perceptimin e hetimit sesa për të çuar drejtësinë deri në fund.
Precedentët e kaluar rrisin skeptizmin publik, siç ishte rasti i hetimeve ndaj Belinda Ballukut — e cila kontrollon prej vitesh një buxhet prej miliardë eurosh dhe ku SPAK prodhoi një dosje, çuditërishr pa ASNJË masë sigurie.
Në rastin e “Albanian Files”, nëse Prokuroria e Posaçme nuk arrin të thyejë këtë logjikë dhe të ndjekë zinxhirin e vendimmarrjes deri në nivelet më të larta, ekziston rreziku real që kjo nismë e bujshme të përfundojë thjesht si një tjetër skedar që prodhoi debate, por jo përgjegjësi penale.
DITA
