Në datën 10 shtator, një ditë pas bisedimeve të tij në Beograd me dy këshilltarët diplomatikë të presidentit francez dhe të kancelarit gjerman, presidenti serb Vuçiç deklaroi se ai mori një propozim për një “kuadër të ri” të bisedimeve të Brukselit për Kosovën.
Lajmi për një “kuadër të ri” apo “kornizë të re” të dialogut midis Serbisë dhe Kosovës, u botua në mediat serbe dhe në disa media në Tiranë.
Por a kanë propozuar vërtetë ndonjë “kuadër të ri” për Kosovën dy këshilltarët diplomatikë të Francës dhe të Gjermanisë?
Në të vërtetë, askush në BE, as Franca, as Gjermania dhe as diplomacia e BE, nuk kanë përmendur dhe as kanë folur për ndonjë “kornizë të re” apo “arkitekturë të re” të dialogut Serbi-Kosovë.
Deklaratat e presidentit serb dhe raportimet në media janë fake.
Një diplomat perëndimor në Bruksel vuri në dispozicion të gazetës “Dita” dokumentin e projekt-marrëveshjes së vërtetë, që u është dorëzuar presidentit serb dhe kryeministrit të Kosovës nga dy këshilltarët diplomatikë francez dhe gjerman.
Projekt-marrëveshja origjinale ka vetëm dy faqe, dhe jo katër siç pretendon propaganda serbe për non-pejpërin e rremë të shpërndarë nga propaganda serbe. Dokumenti orgjinal mban titullin “Marrëveshje bazike midis Kosovës dhe Serbisë” dhe ka gjithsej 10 nene.
Projektmarrëveshja origjinale franko-gjermane e dorëzuar kërkon që në preambul konkretisht “respektin reciprok për integritetin territorial dhe sovranitetin”.
Detajet e kësaj projekt-marrëveshje dhe një analizë e diplomatit Shaban Murati lidhur me të, mund të lexohet nesër në faqen e parë të gazetës DITA.
