“Nuk ju vjen turp, duhet mik deputeti për analizat”, Korreshi: Familjari im ndërroi jetë për një eko

Deputeti i Partisë Demokratike, Saimir Korreshi, në interpelancën me ministren e Shëndetësisë, Evis Sala, ka reaguar me tone të ashpra dhe me akuza të forta ndaj qeverisë.

Interpleancë të cilën deputeti e ka kërkuar për gjendjen në spitalin e Lushnjës, ku dhe ka ngritur alarmin për kushtet e këtij spitali.

Korreshi tha se në spitalin e Lushnjes, ilaçet blihen me lekët e pacientit ndërsa analizat mnd të bëhen vetëm me mik kur ndërhyn deputeti.

Demokrati ka treguar edhe një rast personal, ku tregoi se i afërmi i tij 38-vjeçar ndërroi jetë vetëm për një eko, sepse urgjenca e Lushnjës nuk i konstatoi zemrën e zmadhuar.

Korreshi i drejtoi ministres Sala pyetjen se çfarë zgjidhjeje do të gjejnë për problemet e tyre njerëzit që nuk njohin deputetët, pasi çdo gjë në spital bëhet me mik.

“Ju flet Tirana, dhamë lajmet, harruat ta thoshit. Më nxore mallin e revistës televizive. Nuk ju vjen turp para shqiptarëve, se po të kishit një fije cipë thoshit obobo ku e paskemi lënë shëndetësinë. Hajde ikim në Lushnjë dhe ta shohim gjendjen.

Dhe synetlliqet nuk bëhen më në Lushnjë. Nuk punoi 6 muaj aparati i anestezisë, s’ka frigorifer për t’u mbajtur insulina. Në Lushnjë s’ka asgjë, është kafshëri, vatër infeksioni. Nuk ju vjen turp, keni të bëni me jetë njerëzish.

Haram lekët e shqiptarëve se e keni bërë skandal. Si guxon del këtu dhe na tregon ilaçet, që i blejnë njerëzit vetë. Analizat bëhen me mik.

Kam pasur një humbje të madhe njerëzore në familje, një muaj e gjysmë mori urgjencën, i thanë ik se s’ke gjë. Për një eko vdiq, 38 vjeç vdiq sepse nuk iu konstatua zemra e zmadhuar. Ju jeni kafshë. Duhet të hysh mik që të mbahet një i sëmurë me kancer në spital. Nuk ka asgjë, pse duhet të flas unë që duhet të rregullohet ashensori në spitalin e Lushnjës.

Unë dhe ju i mbarojmë hallet, po njerëzit që nuk njohin deputetë çfarë do bëjnë? Janë në mes të rrugës. Kërkoju falje të gjithëve atyre që janë të shtruar në spitalin e Lushnjës. Notën 10 për stafin mjekësor se dhe në kohën e Enverit nuk janë bërë vizita në ato kushte”, tha Korreshi.

Sipas Korreshit, nga verifikimet, por edhe raporti i auditit shtetëror, ambientet e kuzhinës, magazinës dhe lavanderisë së këtij spitali janë në kushte të këqija, me myk, lagështi dhe mungesë mirëmbajtjeje.

Korreshi theksoi se këto kushte alarmante po rrisin rrezikun e infeksioneve për punonjësit dhe pacientët.

Në fund, depueteti iu drejtua ministres së Shëndetësisë, Evis Sala, për neglizhencë të shërbimeve që ofrohen nga institucionet nën varësinë e saj.

“Pyetja ime për ju është a keni ngrënë mëngjes? Se unë po ju ofroj mëngjesin e Spitalit të Lushnjës të pacientëve. Dhe nga auditi që keni bërë ju, në punë nuk është kuzhiniere, por infermiere. Çfarë do të bëjë? Do të presë një fetë bukë dhe do të mbushë një gotë kos. Kur u audituan ambientet e Spitalit të Lushnjës, rezultoi se magazina qëndrore, lavanderia dhe kuzhina ishin në kushte të këqija. Muret me lagështi, myk dhe të pamirëmbajtura. Kushtet e gatimit dhe lavanderisë ishin të papërshtatshme, duke rritur rrezikun e infeksioneve për punonjësit dhe pacientët. Pse nuk vini me mua dorë për dore që të vizitojmë ambientet e Spitalit të Lushnjës? Çfarë pune bën ministrja e Shëndetësisë? Rri në aeroplan apo duhet të vizitojë edhe spitalet e saj që ka nën varësinë e saj”, tha Korreshi.

j.l./ dita