Një studim i ri në Shqipëri ka sjellë prova të reja se përforcuesi i vaksinës COVID-19 ofron mbrojtje të shkëlqyer kundër infeksionit SARS-CoV-2 te punonjësit e kujdesit shëndetësor.
Studimi u krye nga Instituti Shqiptar i Shëndetit Publik, Qendra e Evropës Juglindore për Mbikëqyrjen dhe Kontrollin e Sëmundjeve Infektive, Zyra Rajonale e OBSH-së për Evropën dhe Qendrat e Shteteve të Bashkuara për Kontrollin dhe Parandalimin e Sëmundjeve. Në studim u zbulua se punonjësit shëndetësorë që morën një përforcues Covid-19 gjatë valës Omicron kishin 88% më pak gjasa të sëmureshin me COVID-19 sesa punonjësit e pavaksinuar shëndetësorë.
I kryer mes afro 1 mijë e 500 punonjësve shëndetësorë në tri spitale nga janari deri në maj 2022 (periudhë kur Omicron qarkulloi gjerësisht në Shqipëri), studimi ofron prova mbi efektivitetin e përforcuesit të vaksinës COVID-19, dëshmi që ka munguar në vendet me të ardhura mesatare në mbarë botën.
“Me infeksionet e Covid-19 në rritje përsëri në Shqipëri dhe globalisht, gjetjet e studimit janë një kujtesë e rëndësishme që vaksinat mbeten mënyra më e mirë për t’u mbrojtur kundër Covid-19,” thotë Silvia Bino, autore e studimit dhe Shefja e ISHP.
Bino thotë se të gjithë punonjësit e shëndetësisë, si dhe popullatat e tjera të cenueshme të bëjnë vaksinën e Covid-19 dhe të gripit këtë vjeshtë dhe dimër, që të zvogëlojnë rrezikun e infektimit.
Thirrja e Binos vjen në një kohë kur marrja e vaksinës perforucuese mbetet e ulët në Shqipëri dhe vende të tjera në Ballkan dhe në të gjithë Rajonin Europian të OBSH-së, i cili mbulon 53 vende në Europë dhe Azinë Qendrore.
OBSH rekomandon që punonjësit shëndetësorë të vijës së parë të marrin një përforcues Covid-19 12 muaj pas vaksinës së fundit.
Për më tepër, OBSH thotë se grupet e tjera të rrezikuar, duke përfshirë të moshuarit dhe njerëzit me probleme shëndetësore të marrin një përforcues Covid-19 6 ose 12 muaj pas dozës së tyre të mëparshme të vaksinës, në varësi të moshës ose problemeve kronike.
Që nga shtatori 2023, vetëm 20% e punonjësve shëndetësorë në Shqipëri kishin marrë një dozë përforcuese kundër Covdi-19 dhe shumica e atyre dozave përforcuese ishin marrë më shumë se një vit më parë.
Kjo marrje e ulët e dozës përforcuese ka ndodhur pavarësisht rekomandimeve të Ministrisë së Shëndetësisë dhe Mbrojtjes Sociale që të gjithë punonjësit shëndetësorë të marrin një përforcues të vaksinës COVID-19 në vitin 2023.
“Vaksinimi i punonjësve nuk është kritike vetëm për to por edhe për shëndetin e pacientëve të tyre. Ndihmon gjithashtu për të siguruar një sistem shëndetësor mirëfunksional dhe të fortë që mund të përballojë më mirë presionin e shtuar këtë vjeshtë dhe dimër, dhe në fund, kujdes më të mirë për njerëzit, shëndeti i të cilëve është parësor”, tha Albana Fico, drejtoresha e QSUT.
“Ndërsa studimi mati efektivitetin e vaksinës përforcuese, studime të tjera kanë gjetur vazhdimisht se dozat përforcuese të Covid-19 shpëtojnë jetë dhe mbrojnë kundër sëmundjeve të rënda,” tha Iris Finci, epidemiologe në OBSH/Europë dhe autore kryesore e studimit.
Në të gjithë Rajonin Europian të OBSH-së, Covid-19 vazhdon të shkaktojë infeksione, shtrime në spital dhe vdekje dhe variante të reja vazhdojnë të qarkullojnë.
Ka gjithashtu të ngjarë që gripi, virusi sincicial i frymëmarrjes (RSV) dhe Covid-19 të qarkullojnë përsëri në të njëjtën kohë këtë vjeshtë dhe dimër, gjë që mund të çojë në rritje të infeksioneve dhe dhe mund të ushtrojë më shumë presion mbi shërbimet shëndetësore.
