Ols Dado “ekspeditë peshkimi” ndaj Veliajt, i bën vetting vjehrrit të ndjerë në tatime, banka, ujësjellësa e hipoteka 7 vite pas vdekjes

Saga e përndjekjes që Prokurori Ols Dado ka bërë ndaj Erion Veliajt nuk është mbyllur vetëm me vetting-un e të gjallëve të familjes së kryebashkiakut të Tiranës në disa breza, por ka vijuar edhe me vjehrrin e tij, botuesin e sipërmarrësin, Arben Jakov Xoxa, 7 vjet pas vdekjes.

Pas dorëzimit të fashikujve të dosjes hetimore, me urdhër të GJKKO-së, për Veliajn dhe mbrojtësit e tij, janë zbuluar të tjera detaje, që shtojnë dozën e përndjekjes. Siç rezulton nga dosja, Prokurori Dado ka kërkuar nga të gjithë ujësjellësat, hipotekat dhe bankat e Shqipeërisë, në atë që mund të quhet “ekspeditë peshkimi”, çdo informacion për vjehrrin e Veliajt, edhe pse dihej botërisht se Arben Xoxa ka ndërruar jetë në 24 Shkurt 2019.

Nga përgjigjet e Ujësjellësit Vlorë, Hipotekës Shkodër, apo Bankat e nivelit të dytë, ka rezultuar se i ndjeri as ka pasur e as mund të ketë llogari 7 vite pas vdekjes.

Gjithashtu, në komunikimet me Anton Martinin (ish prokuror i shkarkuar nga vetting-u, sot kreu i Hetimit Tatimor) rezulton se i ndjeri Arben Xoxa nuk ka aktivitet pas vdekjes, edhe pse Martini shpreh gatishmëri të hetojë edhe vetë për çdo kërkesë të Dados.

Pas Nesti Angonit dhe Nasta Pellumbit, dy emrat anonimë të përdorur për të formalizuar dhe realizuar përndjekjen ndaj Veliajt, vetting-u ndaj të vdekurve të familjes së tij e çon në një tjetër ekstrem një çeshtje tashmë të diskredituar si një nga dështimet e prokurorit Dado. Kryebashkiaku Veliaj ka ngritur dhe ka shprehur publikisht prej disa kohësh konfliktin e interesit me lejet e ndërtimit që Dado i ka kërkuar atij, si dhe paligjshmërinë e emërimit të Dados në vitin 2008, ku nga noter u bë prokuror pa plotësuar kriteret e shkollimit.

Marrë nga TemA