Kreu i Partisë Agrare Ambientaliste, Agron Duka ka folur ditën e sotme në lidhje me takimin me ish kryeministrin Sali Berisha ku u arrit dakordësia për të dalë me një kandidat në zgjedhje.
Ai është shprehur se kanë rënë propozuar sondazhe dhe primare të hapura ndërsa shtoi se do të kenë komunikime edhe me grupet të tjera parlamentare përfshirë edhe grupin e Enkelejd Alibeajt.
“Ne vetë kemi menduar që duhet patjetër të jemi sa më të bashkuar dhe për të dalë me një kandidaturë të vetme sepse nëse do dilnim me disa kandidatura do humbnim. Takimi shkoi shumë mirë. Z. Berisha i priti shumë mirë propozimet tona, si modalitetet për të dalë me një kandidaturë të përbashkët. Ne propozuam ose sondazhet si dhe primare të hapura.
Do shikojmë dhe mundësinë se sa kemi për të shpenzuar, kërkon dhe gatishmërinë. Duhet të flasim dhe me parti të tjera, dhe ato jo parlamentare, grupin e Alibeajt. Mendoj që takimi qe i frytshëm. Shpresoj që kjo dakordësia parimisht të kthehet në detaje. Bëhet një platformë e përbashkët, ku një grup të monitorojë procesin atëherë themi se kemi arritur rezultat”, tha ai.
Duka u shpreh se ideja e tyre për sondazhe dhe primare të hapura është përqafuar edhe nga kryetari i Partisë së Lirisë, Ilir Meta. Sipas tij nëse nuk ndiqet formula e propozuar prej tyre harta politike e qyteteve të Shqipërisë nuk do të ndryshojë.
“Më e mirë do të ishte selektimi përmes sondazheve nga një kompani e huaj ose primare të hapura. Kandidatura do të jetë e dakordësuar nga të gjitha palët. Ka thënë që do diskutojë edhe me parti të tjera. Jo vetëm Berisha por edhe deputetë të tjerë të grupit të Alibeajt kanë shprehur gatishmërinë për të dalë me një kandidat të përbashkët.
Më duket takim premtues. Berisha m’u duk i gatshëm të bashkëpunojmë. Të njëjtën gjë e kemi dëgjuar edhe nga zoti Meta. Nëse bëhet puna me negociata është tjetër gjë. Ne po themi që kandidatë të partive të ndryshme opozitare të mund të konkurrojnë në sondazhe dhe primare të hapura. Ai mund të jetë kandidat nga secila parti. Nëse nuk bëhet kështu do jetë shumë e vështirë që ngjyrat politike të hartës së Shqipërisë të ndryshojë”, deklaroi Duka.
j.l./ dita
