Policia e Tiranës konfirmon vënien në pranga të pesë shtetasve, të cilët janë kapur në flagrancë duke vënë baste sportive nëpërmjet telefonit, në dy prej lokaleve të kryeqytetit.
Sipas policisë, gjatë aksionit, janë sekuestruar pesë aparate celulari, ndërkaq ka nisur puna për zbardhjen e veprimtarisë së tyre.
“Specialistët e Seksionit për Hetimin e Krimeve të Komisariatit të Policisë Nr. 2, në vijim të punës për evidentimin dhe goditjen e veprimtarive të kundërligjshme në fushën e lojërave të fatit, kanë evidentuar dhe goditur dy raste të vënies së basteve sportive, nëpërmjet aparateve celulare dhe kanë finalizuar operacionin policor të koduar “Game over 5”.
Në kuadër të këtij operacioni u arrestuan në flagrancë shtetasit:- B. S, 61 vjeç, P. M, 51 vjeç, D. Ç, 42 vjeç, E. B, 22 vjeç, dhe P. S, 59 vjeç, të pestë banues në Tiranë. Si rezultat i kontrolleve të pandërprera të ushtruara nga shërbimet e Policisë, këta shtetas u kapën në flagrancë, në dy lokale të ndryshme, në rrugën “Tish Daija” dhe “Skënder Luarasi”, duke vënë baste sportive, me celularët e tyre, të cilët u sekuestruan në cilësinë e provës materiale”, thuhet në njoftimin e policisë.
p.k\dita
