Në kuadër të planit operacional të koduar “Basti i fundit”, vijojnë goditjet ndaj organizimit të kundërligjshëm të lojërave të fatit.
Kishte kthyer lokalin që posedonte, në dispozicion të vënies së basteve sportive, në kundërshtim me ligjin, përfundon në pranga 42-vjeçari në Kurbin.
Gjatë kontrollit të ushtruar në ambinetet e lokalit policia bën me dije se janë sekuestruar celularë dhe pajisje të tjera elektronike që përdoreshin për këtë veprimtari.
“Specialistët e Seksionit për Hetimin e Krimeve të Komisariatit të Policisë Kurbin, në vijim të kontrolleve në lokale dhe në ambiente të tjera, të ushtruara në kuadër të planit operacional të koduar “Basti i fundit”, si dhe me mbështetjen e inteligjencës informative, kanë evidentuar dhe goditur një rast tjetër në këtë fushë, për të cilin u vu në pranga shtetasi Y. V., 42 vjeç, banues në Kurbin. Gjatë kontrollit në lokalin që posedonte 42-vjeçari, shërbimet e Policisë gjetën aktive, faqe online për vënien e basteve sportive, në kundërshtim me ligjin, celularë dhe pajisje të tjera që i shërbenin kësaj veprimtarie, pajisje të cilat u sekuestruan në cilësinë e provës materiale”, thuhet në njoftimin e policisë.
Materialet procedurale i kaluan Prokurorisë pranë Gjykatës së Rrethit Gjyqësor Kurbin, për veprime të mëtejshme, për veprat penale “Organizimi ose ushtrimi i veprimtarive të lojërave të fatit në kundërshtim me ligjin” dhe “Vënia në dispozicion e lokaleve për lojëra të palejuara”.
p.k\dita
