Klasa e super të pasurve minon bashkëpunimin për të trajtuar varfërinë

Ndërsa udhëheqësit botërorë marrin pjesë në takimin e Asamblesë së Përgjithshme të Kombeve të Bashkuara në Nju Jork, organizata bamirëse Oxfam thotë se puna e tyre po dëmtohet nga ajo që e quan ‘oligarki globale’ e super të pasurve që kontrollojnë ekonominë botërore.

Siç njofton korrespondenti i Zërit të Amerikës, Henry Ridgwell, Oxfam e akuzon klasën e super të pasurve për përkeqësimin e problemeve, sidomos, pabarazinë ekstreme.

Asambleja e Përgjithshme e Kombeve të Bashkuara synon të ofrojë një platformë të barabartë që udhëheqësit të diskutojnë çështjet më urgjente botërore si varfëria dhe ndryshimet klimatike.

Por një raport i ri nga organizata bamirëse Oxfam thotë se takimi vjetor i udhëheqësve botërorë po zhvillohet nën hijen e asaj që e quan ‘oligarki globale’ e kontrolluar nga korporatat super të pasura.

Zëri i Amerikës bisedoi me zotin Nabil Ahmed i cili udhëheq grupin për drejtësi ekonomike dhe racore me departamentin e Oxfam-it për Amerikën.

“Ata po ndikojnë në krijimin e rregullave në favor të tyre dhe po e bëjnë këtë në kurriz të njerëzve të zakonshëm. Kjo po nxit pabarazi brenda dhe midis shteteve”.

Oxfam thotë se jemi në një epokë të pabarazisë globale ekstreme, ku një grup që përbën 1% të popullsisë së botës zotëron më shumë pasuri se 95% e pjesës tjetër të botës.

“Jetojmë në një botë ku shumë nga mega-korporatat paguajnë pak ose aspak taksa”, thotë Nabil Ahmed me organizatën Oxfam.

Brazili, i cili aktualisht mban presidencën e vendeve të G20, kërkon të vendosë një taksë minimale prej 2% për miliarderët më të pasur të botës dhe thotë se kjo do të siguronte menjëherë deri 250 miliardë dollarë.

Kjo përpjekje mbështetet nga organizata Oxfam dhe shumë grupe të tjera joqeveritare.  Plani mbështetet edhe nga disa vende të G20, përfshirë Afrikën e Jugut, Spanjën dhe Francën, por kundërshtohet nga Shtetet e Bashkuara, që thonë se një marrëveshje globale është shumë e ndërlikuar dhe e panevojshme.

Ministri i financave i Brazilit tha në korrik se transformimi i sistemit aktual të taksave ishte jetik. Por sekretarja amerikane e Thesarit, Janet Yellen, u shpreh kundër masës gjatë takimit të vendeve të G20 në muajin korrik.

“Është shumë e vështirë që politika e taksave të koordinohet globalisht dhe nuk e shohim nevojën ose dëshirën për të negociuar një marrëveshje të tillë globale. Ne mendojmë se të gjitha vendet duhet të sigurohen që sistemi i tyre i taksave të jetë i drejtë dhe progresiv”, tha Sekretarja e Thesarit, Janet Yellen.

Oxfam thotë gjithashtu se vendet në zhvillim i shpenzojnë të ardhurat nga taksat për të paguar kreditorët privatë dhe bankat.

Organizata bamirëse akuzon gjithashtu kompanitë e mëdha farmaceutike për ndikimin në krijimin e rregullave për të drejtat e pronësisë intelektuale nga të cilat përfitojnë aksionaret e tyre.

Organizata Oxfam thotë se gjatë koronavirusit kompanitë farmaceutike fituan miliarda dollarë.

“U përdorën paratë e taksapaguesve për zhvillimin e vaksinave. Fondet për investime publike të parashikuara për disa dekada u përdorën për krijimin e vaksinës mRNA”, thotë zoti Ahmed.

Me shkurtime nga VOA