Sikundër ndodh me shumë shërbime të tjera, edhe vërtetimi për pagesën e papunësisë mund të merret online në portalin qeveritar “e-albania”. Nëse aplikimi do të jetë i rregullt, ju do të mund të merrni këtë vërtetim brenda 10 ditësh, nga momenti i plotësimit të kërkesës.
Ky dokument vërteton përfitimet nga programi (masën e pagesës dhe periudhën e përfitimit) që mund të nevojitet për përllogaritjen e viteve të vjetërsisë në punë për efekt pensioni, apo për të ardhurat që përfiton personi që është përfitues nga programi aktualisht, apo edhe kur kërkohet një gjë e tillë nga institucione që e kanë kriter përfitimi deklarimin e tyre.
“Shërbimi elektronik i aplikimit për vërtetim pagë papunësie në portalin qeveritar “e-albania” i vë në dispozicion qytetarit mundësinë për të bërë një kërkesë online për lëshim vërtetimi për bazën e vlerësueshme dhe pagën neto mesatare drejt një zyre pune. Ky shërbim elekronik i ofrohet çdo qytetari, nga profili i tij tek portali e-albania”, bëjnë me dije autoritetet e sigurimeve shoqërore.
Sipas procedurave të përcaktuara, për të marrë këtë vërtetim fillimisht duhet të bëni aplikimin në portalin qeveritar, ku duhet të identifikoheni si qytetar. Në vijim do të duhet të zgjidhni shërbimin e listuar si “Vërtetim pagë papunësi”, dhe të klikoni në butonin “Përdor”, ku duhet të plotësoni të dhënat e formës së kërkesës për lëshim vërtetimi për bazën e vlerësueshme dhe pagën neto mesatare duke zgjedhur zyrën e punës, periudhën për të cilën kërkon vërtetimin. Pas plotësimit të saj, sistemi e dërgon me email dhe zyra e punës përkatëse merr kërkesën dhe e trajton atë, duke konfirmuar edhe lëshimin e këtij dokumenti.
Afati i vlefshmërisë mund të jetë 3 muaj, 6 muaj, 9 muaj, 12 muaj (periudha e përfitimit në varësi të periudhave kontributive).
p.k\dita
