Në prag të nisjes së vitit të ri shkollor 2023-2024, këtë të premte ministri i Brendshëm, Taulant Balla, ministrja e Arsimit, Evis Kushi, si dhe drejtori i Përgjithshëm i Policisë së Shtetit, Muhamet Rrumbullaku, kanë prezantuar planin e masave të sigurisë në shkolla.
Ministri i Brendshëm, Taulant Balla, bëri me dije se brenda javës policia vendore dhe bashkitë duhet të identifikojnë dhe përcaktojnë perimetrin e sigurisë së çdo shkolle, i cili do të jetë të paktën 50 metra.
“Policia e Shtetit ka detyrën e garantimit të sigurisë publike në të gjitha format. Kur prindërit, gjyshërit, i çojnë fëmijët në shkollë, ata ia besojnë fëmijët Shtetit. Jo vetëm institucioneve arsimore, publike a private ku i kanë regjistruar.
Strukturat vendore të Policisë së Shtetit, në bashkëpunim me Bashkitë, do të identifikojnë dhe përcaktojnë Perimetrin e sigurisë së çdo shkolle, sipas vlerësimit të situatës në terren, por në çdo rast jo më pak se 50 metër rreth gardhit kufizues të secilës shkollë”, tha Balla.
Ministri theksoi se brenda muajit do të propozohet një paketë ndryshimesh ligjore për ashpërsimin e dënimit për veprat penale që kryhen brenda perimetrit të sigurisë së shkollave.
“Brenda këtij muaji, do të propozojmë një paketë ndryshimesh ligjore për ashpërsimin e dënimit për veprat penale që kryhen brenda Perimetrit të Sigurisë së shkollave, duke filluar në radhë të parë nga shitja dhe shpërndarja e lëndëve narkotike, e më tej mbajtja pa leje e armëve të zjarrit dhe armëve të ftohta, si dhe çdo vepër dhune, shfrytëzimi, prostitucioni apo pornografie. Objektivi ynë kryesor është parandalimi i kriminalitetit dhe i përdorimit të substancave narkotike në radhët e të rinjve, si dhe goditja pa kompromis e rrjetit të shpërndarjes së drogës në Perimetrin e Sigurisë në shkolla e në rang vendi. Në ditët në vijim dhe sistematikisht në javët në vijim, unë pres nga Policia në bashkëpunim me Prokurorinë, rezultate domethënëse në luftën kundër “spaciatorëve”. Ky është një Operacion Kombëtar, më i madhi i zhvilluar ndonjëherë, nën komandën direkt të Drejtorit të Përgjithshëm të Policisë së Shtetit”, deklaroi Ministri.
Sa i përket sigurisë rrugore, Balla bëri me dije kërkesën që do u bëhet Bashkive për të marrë masat e nevojshme për vendosjen dhe mirëmbajtjen e sinjalistikës rrugore, vertikale dhe horizontale, dhe semaforëve të nevojshëm brenda Perimetrit të Sigurisë së shkollave, brenda një afati 90 ditor nga sot.
Ndërsa ministrja Kushi e vendosi rëndësinë te projekti për oficerët e sigurisë .
Ajo u shpreh se ky projekt, ka qenë ndër më të mirë që mund të jetë marrë, pasi ka ndihmuar në menaxhimin dhe parandalimin e problematikave për dhunën, konfliktet në shkolla, etj.
“Iniciativa e Ministrisë së Brendshme që së bashku të rrisim përpjekjet dhe forcojmë bashkëpunimin për të ngritur sigurinë në shkolla në një nivel të ri përmes një pakete të re masash prej tij.
Vitet e fundit ka pasur një vëmendje të shtuar përsa i takon rritjes së sigurisë në shkolla dh luftës kundër fenomeneve negative sociale,: dhuna, bullizmi, kërcënimet, përdorimi i lëndëve narkotike dhe krimet e internetit.
Masat e marra konsistojnë në: ndryshimet ligjore dhe aktet nënligjore; forcimi i shërbimit psiko-social; pasurimi i kurrikulës me tema dhe disiplina të ndryshme; aktivitete ekstra kurrikulare; bashkëpunimi me familjen, komunitetin, policinë e shtetit, ka ardhur në rritje.
Një nga vendimet më të mira që kemi marrë ka qenë qasja e projektit “siguria në shkollë, oficerët e sigurisë në shkolla”.
p.k\dita
