Ministri i Jashtëm i Austrisë, Alexander Schalenberg tha se sulmi i Rusisë në Ukrainë duhet të zgjojë Bashkimin Evropian lidhur me procesin e anëtarësimit.
Schalenberg foli pas takimit me ministren e Jashtme të Kosovës, Donika Gërvalla, me të cilën biseduan edhe për dialogun Kosovë-Serbi, raporton KosovaPress.
Për këtë proces, diplomati austriak tha se nuk duhet të vihet në dyshim se duhet të përfundojë me njohje reciproke.
Ministri i Jashtëm i Austrisë tha se Rusia mund të krijojë shqetësime dhe të destabilizojë rajonin, ndaj sipas tij Evropa duhet të jetë e vëmendshme.
“Ne duhet të kemi parasysh që Moska e ka mundësinë që të bëjë destabilizim të rajonit. Vetëm me një provokim ata mund të krijojnë shqetësime, mund të destabilizojnë rajonin dhe kjo gjë na vë në alarm. Mendojmë që sulmi i Rusisë në Ukrainë është vërtetë një thirrje për të zgjuar Bashkimin Evropian për të trajtuar synimin e anëtarësimit në BE, dhe kjo gjë nuk ka qenë asnjëherë më e rëndësishme se tani. Premtimi që është dhënë para 19 viteve në Selanik, është e rëndësishme që të zbatohet tani. Të mbajmë këtë premtim, pra të hapen negociatat me Maqedoninë e Veriut dhe Shqipërinë dhe të bëhet liberalizimi i vizave për Kosovën. Jeni shteti i vetëm i cili është pjesë e programit i cili ende nuk e ka liberalizimin e vizave, natyrisht që edhe në samitin e radhës do të shpreh këtë gjë”, tha ai.
o.j/dita
