Ditën e sotme, Presidenti i Republikës së Polonisë, Andrzej Duda së bashku me zonjën e parë të Polonisë, Agata Kornhauser-Duda, do të vizitojnë Shqipërinë.
Kjo është vizita e parë zyrtare pas 20 vitesh e një presidenti polak në Shqipëri.
Duda do të pritet nga Presidenti Begaj, në Institucionin e Presidentit të Republikës.
Pas ceremonive të mirëseardhjes, të dy Presidentët do të zhvillojnë një takim të veçantë dhe më pas do të kryesojnë delegacionet e të dy vendeve në një takim të zgjeruar, ndërsa në mbarim të takimit, të dy presidentët do të zhvillojnë një konferencë për media.
Në pjesën e dytë të ditës, në orën 16:30, të dy presidentët do të marrin pjesë dhe do t’i drejtohen me mesazhe, forumit të përbashkët ekonomik që do të zhvillohet me pjesëmarrjen e sipërmarrjeve nga të dy vendet.
Duda shoqërohet në këtë vizitë nga një përfaqësi sipërmarrësish polakë, të organizuar nga Agjencia Polake e Investimeve dhe Tregtisë (PAIH).
Gjatë qëndrimit në Shqipëri Presidenti Dudaj do të zhvillojë edhe një vizitë të shkurtër në qytetin e Krujës.
j.l./ dita
