Pas 3 vitesh peripeci nga familja, pas vdekjes misterioze të shqiptari Saimir Sula, në Spitalin Del Mar në Barcelonë, e motra e viktimës ka njoftuar se zemra e të ndjerit në muajt maj-qershor 2023 do të kthehet në Shqipëri për të kuptuar se çfarë ka ndodhur me viktimën në Spitalin Del Mar në Barcelonë.
I riu shqiptar, 3 vite më parë, më 8 Maj 2020 shkoi në spital për një test Covidi, pasi ishte me temperaturë. Testi rezultoi negativ. Majlinda, motra e tij pas një telefonate me të nuk e pa më të gjallë vëllain.
Spitali konfirmoi vdekjen e 31-vjeçarit rreth mesditës së 9 Majit 2020. Fillimisht nga spitali u tha që Saimir Sula është axhituar dhe gjatë momentit të neutralizimit nga rojet e spitalit, i ka pushuar zemra. Por e motra e viktimës denoncoi përmes fotove se Saimiri kishte shenja dhune në trup. Instituti i Mjeksisë Ligjore në Barcelonë nuk ka një konkluzion të saktë për shkaqet e vdekjes. Çështja u referua në Gjykatë në Barcelonë, por ngjarja nuk u zbardh sërish.
Pas këmbënguljes së motrës së viktimës, trupi i Saimir Sulës erdhi 3 javësh në Shqipëri. Familjarët kërkuan bërjen e një tjetër autopsie. Por Instituti i Mjeksisë Ligjore në Tiranë nuk mundi të bënte dot autopsinë pasi trupi kishte kaluar në fazën e dekompozimit. Mjekët konstatuan mungesën e zemrës në trupin e pajetë të 31-vjeçarit.
Pas denoncimit të familjarëve, Ministria e Drejtësisë dhe ministri Manja i ka dërguar një letër homologes spanjolle ku i kërkon që të bëjë kujdes në mënyrë që gjykata e Barcelonës të përmbushë me përparësi kërkesat e Prokurorisë së Tiranës për zbardhjen e të vërtetës objektive.
Nga ana tjetër, Prokurorë të Prokurorisë së Tiranës kanë zhvilluar një takim në Barcelonë me kolegët e tyre atje për cështjen në fjalë. Pas këtyre takimeve, në muajt maj-qershor është konfirmuar se do të kryhet ekspertiza ligjore e zemrës së viktimës për të mësuar më shumë shkaqet e vdekjes së tij.
m.b./dita
