Mimoza Paja ishte viktimë e pafajshme e breshërisë së plumbave që kishin për qëllim të shuanin jetën e shumë personave që ndodheshin në lokalin e Fatjon Muratit, por që fatmirësisht të gjithë shpëtuan.
Sot, pikërisht në banakun ku ajo punonte, ka shkuar gazetarja Anila Hoxha, e cila ka parë nga afër sendet personale të Mimozës që edhe sot kanë mbetur të palëvizura nga vendi i ngjarjes.
Veç shenjave të plumbave, shenja të tjera domethënëse tregojnë se sa e brishtë është jeta e qytetarit në Shqipëri. Shapkat e Mimozës, syzet dhe xhupi i saj janë ende në vendin ku ajo u vra nga krimi, të pamarra nga askush, edhe pse 58-vjeçarja u përcoll për në banesën e fundit, ndërkohë që lokali është ende i rrethuar me shirita.
Askush nuk hyn përveç grupit hetimor që ende mbledh të dhënat për të mësuar se çfarë ka ndodhur, por autorët duket se janë shumë larg kapjes
Çfarë ndodhi dhe pse u vra Mimoza Paja?
Masakra ndodhi pak ditë më parë në Don Bosko. Dy persona qëlluan me breshëri plumbash në drejtim të lokalit të Fatjon Muratit duke lënë të vdekur banakieren Mimoza Paja, 58 vjeçe dhe pesë të tjerë të plagosur, mes tyre dhe një vajzë 10-vjeçare që u dëmtua nga xhamat e thyer.
Të plagosurit e tjerë janë Sahit Murati (xhaxhai i Fatjon Muratit), Astrit Meraj, Emanuel Sala, Ermir Bejuku, Genc Shohalli, të gjithë jashtë rrezikut për jetën. Murati vetë ndodhej jashtë Shqipërisë në momentin që u krye atentati. Ai është i njohur në botën e krimit dhe si miku i ngushtë i Endrit Dokles, madje është marrë në pyetje për masakrën e Fushë Krujës, ku mbeti i vrarë Brilant Martinaj me dy miqtë e tij. Murati tashmë është shpallur në kërkim.
.
m.b./dita
