Trupat e dy ushtarëve gjermanë të Luftës së Dytë Botërore janë gjetur në lumin Danub në Budapest, për shkak të nivelit rekord të ulët të ujit pas një thatësire të fortë.
Pranë tyre u gjetën edhe etiketat e identifikimit të dy ushtarëve, një motor i ushtrisë gjermane Wehrmacht, një unazë martese dhe një mburojë “Kuban”.
Gjetjet kanë ngjallur shpresën se disa familje mund të zbulojnë më në fund fatin e paraardhësve të tyre, më shumë se 80 vjet pas përfundimit të luftës.
“Tani fillon një enigmë, në të cilën do të përpiqemi të përcaktojmë identitetin e dy të vdekurve”, tha Arne Schrader, nga Komisioni Gjerman i Varreve të Luftës, për gazetën gjermane Bild. Zbulimet u bënë më 2 gusht, kur një kalimtar njoftoi se një pjesë e motorit kishte dalë mbi shkëmbinjtë në bregun e lumit, në qendër të Budapestit.
Ekipi gjeti gjithashtu mina antitank, duke çuar në mbylljen e përkohshme të bregut të lumit, ndërsa u angazhua një njësi për çaktivizimin e bombave.
Motori mendohet të jetë një model DKW NZ 350-1, i cili u prodhua posaçërisht për përdorim gjatë luftës, duke nisur nga viti 1944. Komisioni shtoi se nga dy etiketat e gjetura, njëra i përkiste një ushtari të Wehrmacht-it, ndërsa tjetra një anëtari të Waffen-SS, organizatë e shpallur kriminale dhe përgjegjëse për krime lufte gjatë proceseve të Nurembergut.
