Prokuroria pranë Gjykatës së Shkallës së Parë Tiranë ka kërkuar arrest me burg për dy shtetas shqiptarë dhe dy shtetas italianë, të akuzuar pastrim parash përmes tregtisë së floririt.
Këta persona përdornin skemën e transferimit të shumave monetare me prejardhje të dyshuar kriminale nëpërmjet sistemit bankar nga Italia me destinacion Shqipërinë.
“Prokuroria pranë Gjykatës së Shkallës së Parë Tiranë kërkoi vendosjen e masës së sigurisë “Arrest në burg” për dy shtetasit shqiptarë K.K., dhe K.K. si dhe dy shtetas italianë P.C. dhe N.T. të akuzuar për veprat penale “Fshehja e të ardhurave” parashikuar nga neni 180 i Kodit Penal dhe “Pastrimit të produkteve të veprës penale ose të veprimtarisë kriminale” parashikuar nga neni 287/2 i K.Penal”, njofton Prokuroria.
Kjo e fundit ka zbërthyer skemën që përdornin dy shqiptarët dhe dy shtetasit italianë për pastrimin e parave, ku përmes një shoqërie fiktive kryeheshin blerjet dhe shitjet e floririt me fatura tatimore me qëllim justifikimin e transfertave të vlerave të larta monetare me origjinë të dyshuar kriminale nga Bankat italiane në ato shqiptare.
Sipas njoftimit bëhet me dije se “Këto transferta në dukje të justifikuara me anë të një faturimi të rregullt, pra duke i paraqitur si pagesa të blerjeve të floririt të përdorur, arrinin t’i shpëtonin kontrollit të agjencive mbikëqyrëse në fushën e pastrimit të parave dhe sapo këto shuma mbërrinin në Shqipëri tërhiqeshin kesh dhe zhdukeshin”.
p.k\dita
