Një tjetër efektiv i Policisë së Shtetit humbi jetën tragjikisht në një aksident rrugor në orët e vona të mbrëmjes. Raportohet nga hetimet paraprake se viktima është Agron Saba, 58 vjeç, i cili shërbente në rolin bazë në Stacionin e Policisë Patos dhe po shkonte për punë. Aksidenti ka ndodhur rreth orës 21:35, në aksin rrugor Patos-Fier, thanë kolegët e të ndjerit.
Efektivi Saba ka qenë duke drejtuar mjetin tip “Opel”, kur ka humbur kontrollin dhe është përplasur me një mjet tip “Benz”, i cili drejtohej nga një 27 vjeçare. Polici fatkeqësisht nuk ka mundur t’i mbijetojë plagëve të marra dhe për pasojë ka ndërruar jetë. Grupi hetimor shkoi në vendngjarje dhe po punon për zbardhjen e shkaqeve të aksidentit. Blutë kanë shoqëruar për veprime proceduriale edhe drejtuesen e mjetit tjetër, e cila gjithashtu mori lëndime.
