Edhe PDIU është ndarë nga PD, tashmë zyrtarisht. Kreu i PDIU, Shpëtim Idrizi ka shpërndarë një deklaratë për media ku ndër të të tjera thuhet:
“Në respekt të interesimit te mediave: Bazuar në ndryshimet e fundit Kushtetuese për heqjen e koalicioneve, PDIU ka marrë vendimin që të dalë e vetme në zgjedhje. Më duhet të theksoj që PDIU nuk është kontaktuar asnjë here, nga asnjë nga dy palët e PD, për të kërkuar bashkëpunimin e saj.
PDIU e ka bërë të qartë që nuk përfshihet dhe nuk mban anë në debatin e brendshëm në PD, por në mënyrë të përsëritur ka bërë thirrje që ata që flasin në emër të demokratëve e kanë detyrë që të bashkohen e të sjellin një forcë solide në zgjedhjet që priten të mbahen”.
Idrizi ka komentuar edhe deklaratën e djeshme të Berishës që u kujtonte çamëve se si i kishte masakruar Zerva, duke vënë dhe Enverin në të njëjtën listë.
“Shqiptarët e Ҫamërisë e njohin mirë historinë e tyre dhe të parëve të tyre dhe e dinë mirë se si i vrau e masakroi Napoleon Zerva me bandat e tij, por po kaq e padrejtë është dhe intimidimi, indiferenca e partive politike kryesore në këto 32 vite.
Çështja çame do të zgjidhet kur të gjitha partitë politike me mbështetjen e aleatëve tane SHBA, BE dhe Britani e Madhe, të vendosin të parin interesin kombëtar dhe jo partiak a të liderëve të tyre”.
Kreu i PDIU thekson edhe faktin që PD e Berishës në këto zgjedhje kandidon një si Fredi Beleri.
“PDIU nuk i ka bërë kurrë thirrje mbështetësve të një partie tjetër politike se si duhet të votojnë, por sot është koha t’i bëjmë thirrrje shqiptarëvë të mos votojnë Fredi Bejlerin, njeriun e akuzuar për masakrën e Peshkëpisë dhe i dënuar me vendimin e Gjykatës Vlorë, me nr 224/24.9 2004 dhe me numër 302/26.12.2006 me 3 vite burg për dhunim të simboleve shtetërore shqiptare.
Shqiptarët nuk mund e nuk duhet të votojnë njeriun që bën edhe sot fushatë me flamurin e Vorio Epirit, i cili advokon autonominë e Vorio- Epirit, i cili tenton të prekë tërësinë territoriale të Shqipërisë, atdheut tonë, – përfundon deklarata.
i.b. / dita
