Kryeministri Edi Rama gjatë fjalës së tij në rrjetet sociale ka bërë me dije se Parlamenti Evropian do të hapë zyrën e Ballkanit Perëndimor në Tiranë, ndërsa tha se kjo ishte vlerësim i jashtëzakonshëm për vendin. Ai gjithashtu bëri me dije se një zyrë tjetër ndoshta do të hapet në Maldive. Rama gjithashtu foli për samitin e 16 majit ndërsa theksoi se kanë nisur përgatitjet për të pritur liderët e BE-së. Ai sqaroi shkurtimisht anxhendën për datën 15 dhe 16 maj.
“PE do të hapë zyrën në Tiranë, si ju duket kjo? PE ka tre zyra aktualisht, një në New York, një në Xhakarta dhe një për marrëdhëniet me Bashkimin Afrikan. Sot Tirana bëhet vendi mikprites për zyrën e re të Parlamentit Europian. Një tjetër me gjasë do hapet në Moldavi. Ky është një vlerësim i jashtëzakonshëm. Ndërkohë kanë filluar përgatitjet për samitin e komunitetit europian më 16 maj. Nëdrkohë më 15 mirëpresim liderët e BE. Një ditë mbrapa presim gjithë liderët e Europës me përjashtim të Rusisë, sigurisht,” tha Rama.
Në njoftimin e bërë publik në faqen zyrtare të PE-së thuhet se në kontekstin e tensioneve të rritura gjeopolitike dhe të një momentumi të ri për zgjerimin e BE-së, zyra e re e Parlamentit në Tiranë do të shërbejë si një pikë kyçe kontakti midis Parlamentit Europian dhe parlamenteve kombëtare, shoqërisë civile dhe partnerëve lokalë në Ballkanin Perëndimor.
Sipas njoftimit kjo zyrë do të promovojë qëndrimet dhe aktivitetet e Parlamentit, veçanërisht në lidhje me anëtarësimin në BE, si dhe do të mbështesë demokracinë dhe reformat institucionale në rajon. Gjithashtu, PE thotë se kjo zyrë do të ndihmojë në përgatitjen dhe ndjekjen e vizitave zyrtare të eurodeputetëve, duke forcuar njëkohësisht bashkëpunimin me aktorët e tjerë të BE-së në terren dhe me organizatat ndërkombëtare dhe ato të shoqërisë civile.
Aktualisht, Parlamenti ka tre zyra operacionale në Nju Jork, për marrëdhëniet me Kombet e Bashkuara; në Xhakarta, për marrëdhëniet me Shoqatën e Kombeve të Azisë Juglindore (ASEAN); dhe në Addis Ababa, për marrëdhëniet me Bashkimin Afrikan.
j.l./ dita
