Detaje të reja dalin në dritë lidhur me zhdukjen e mistershme të Inez Hajrullës, një prej personazheve më të njohur dhe të shumëkërkuar nga drejtësia shqiptare, i njohur ndryshe me nofkën “El Padrino” i Vlorës.
Mësohet se vetëm një ditë përpara se në media të qarkullonte lajmi për pengmarrjen e tij të mundshme, uniformat e plota kanë kryer një operacion blic në zonën e Vaqarrit.
Sipas informacioneve operacionale, Policia e Shtetit kishte siguruar të dhëna se i kërkuari ndodhej i strehuar në njërën nga dhomat e një hoteli në Vaqarr, në shoqërinë e një vajze.
Mbi bazën e këtij informacioni, shërbimet e Komisariatit Nr. 6, të mbështetura nga nga forca të tjera operacionale, zbarkuan në ambientet e hotelit për të bërë verifikimet dhe arrestimin e tij. Por gjatë kontrollit të imtësishëm, Hajrulla nuk u gjet në ambientet e hotelit.
Aktualisht, grupi hetimor po verifikon me përparësi nëse Hajrulla është dekonspiruar dhe ka marrë njoftim paraprak nga persona të tretë përpara se forcat e policisë të mbërrinin në vendngjarje.
Për të ndërtuar dinamikën e plotë të lëvizjeve janë sekuestruar të gjitha pamjet e kamerave të sigurisë të hotelit dhe janë shoqëruar e pyetur pjesëtarë të stafit si dhe klientë për të konfirmuar praninë e tij.
Pistat e hetimit: Inskenim apo eliminim nga kundërshtarët?
Të nesërmen e operacionit të dështuar në Vaqarr, mediat raportuan për humbjen e kontakteve dhe një pengmarrje të mundshme të Hajrullës.
Në këto kushte, policia po hetion paralelisht dy pista kryesore. Dritarja kohore midis largimit nga hoteli dhe ndjekjes nga policia mund të jetë shfrytëzuar nga vetë Hajrulla për të inskenuar një rrëmbim, me qëllim shmangien e kapjes tani që rrethimi i tij u ngushtua së tepërmi.
Zhdukja e tij mund të jetë shfrytëzuar nga grupet rivale kriminale për ta rrëmbyer atë në momentin kur ishte zbuluar nga policia.
Ndonëse ende nuk ka bërë një kallëzim zyrtar në polici për zhdukje, babai i të kërkuarit, Robert Hajrulla, ka konfirmuar se nuk ka asnjë kontakt me të birin prej të paktën dy ditësh.
Inez Hajrulla është një emër i njohur për organet e zbatimit të ligjit, i akuzuar për një sërë ngjarjesh të rënda kriminale. Hetimet vazhdojnë për të zbardhur të vërtetën mbi fatin e “El Padrinos” së Vlorës.
