Gazetari Artan Hoxha ka zbardhur një episod se si Ervin Mata, i cili dy ditë më parë u shpall në kërkim nga SPAK si pjesë e një bande kriminale të trafikut të drogës, ishte marrë peng disa kohë më parë nga grupi i Ervis Martinajt në qendër të Tiranës.
Artan Hoxha zbuloi se ngjarja ka ndodhur paradite në sytë e të gjithëve, kur Ervin Mata u mor peng në ambientet e një garazhi dhe iu kërkua që të tërhiqej nga një ndërtim që po bëhet aktualisht, dhe për këtë ju ofruan 2 milionë Euro.
Bëhet fjalë për një pallat që po ndërtohet tek ish-Ekspozita në Tiranë.
“Ka patur një ngjarje kur Ervin Matën e kanë marrë peng para RTSH dhe kjo ngjarje ka ndodhur në orën 11:00 të ditës. Është marrë peng nga grupi i Ervis Martinajt.
Kanë dalë e kanë marrë e kanë çuar në një nga ata qendrat tregtare aty afër, në garazhet e asaj. Është mbajtur për disa orë për çështjen e një ndërtimi shumë të madh në Tiranë. I është ofruar një pagesë 2 milion euro që të tërhiqej si aksioner nga ai ndërtim që është duke u bërë aktualisht në Tiranë. Ai ka thënë që unë nuk kam lidhje me këtë punë sepse unë nuk jam vetë aty. Unë as nuk i dëgjoj të tjerët dhe as të tjerët nuk më dëgjojnë mua dhe në këtë rast nuk mund të përfshihem në këtë histori. Kjo ngjarje është bërë fiks në orën 11 paradite para RTSH, por nuk ka pasur hetim për këtë.
Kjo ngjarje duhet të ketë ndodhur para plagosjes. Edhe plagosja ka qenë një pikë vlimi e disa incidenteve të mëparshme dhe ajo kulmoi me ngjarjen në ish-Bllok”, tha Artan Hoxha.
j.l./ dita
