Nga Kosta Barjaba
Botuar në DITA
Ndër shtatëmbëdhjetë kandidatët e rinj socialistë për kryebashkiakë, publikut i tërhoqi vëmendjen kandidati për Bashkinë e Sarandës, sipërmarrësi Olti Çaçi.
Kam lexuar në media dhe kam dëgjuar interpretime të ndryshme për këtë kandidat.
Një sipërmarrës i suksesshëm në sektorin e turizmit, trashëgimtar e vazhdues i punëve të shkëlqyera të të atit, të cilit i mori jetën Covid-19.
Një menaxher i shkëlqyer në sektorin privat dhe prej disa vitesh me aktivitet turizmi edhe në Sarandë.
Me plot energji që ia jep mosha, aftësitë, formimi, përvoja, dhe partneritetetI në biznesin privat.
Që me qytetin ku kandidon të bëhet qytetar i parë, e lidh “fati” i përbashkët: zhvillimi dhe suksesi prej turizmit.
Me sipërmarrjen e tij dhe të familjes ka krijuar vende pune dhe shanse për sarandiotët që e kanë lidhur jetën me qytetin e tyre.
Me origjinë nga Tepelena. Por ndryshe nga bashkëtepelenasit që janë vendosur në Sarandë, Olti vente e vinte dhe vete e vjen, duke ndjekur sezonin turistik dhe bizneset e tjera nëpër Shqipëri.
Por me Sarandën nuk e lidhin vetëm këto. E lidh edhe historia. E lidh një lapidar simbolik në qendër të fshatit Sopik, dikur i rrethit Sarandë, i cili përjetëson revoltën e fshatarëve të Sopikut kundër agallarëve në shtator 1927.
Kjo revoltë, të cilës i prinë gratë e Sopikut, njihet në histori si një ngjarje domethënëse kundër padrejtësive e grabitjeve të fshatarëve të varfër prej agallarëve. Bashkorganizator i revoltës ishte kryeplaku i fshatit, Thodhori Koço Nano, stërgjyshi nga nëna i kandidatit Oltion Çaçi.
Pra, ndër avantazhet që përmendëm më sipër, kandidati socialist për kryetar bashkie i Sarandës, Olti Çaçi, nuk ka vetëm të sotmen e të ardhmen, por edhe historinë dhe origjinën.
Që e bën atë një tepelenas edhe nga Sopiku, edhe nga Saranda!
