Emërimi i një prokurori të posaçëm nga niveli më i lartë shtetëror konsiderohet një hap i rrallë, i cili pason pakënaqësinë masive ndaj zbatimit të ligjit në nivel vendor për krimet seksuale në kampuset universitare me reputacion ndërkombëtar.
Guvernatorja e Shtetit të Nju Jorkut, Kathy Hochul, ka nënshkruar një urdhër ekzekutiv për heqjen e juridiksionit nga prokurori vendor i rrethit dhe caktimin e Prokurores së Përgjithshme të shtetit, Letitia James, si Prokurore e Posaçme (Special Prosecutor) për rihetimin e ngjarjes së rëndë të ndodhur në Universitetin e njohur Cornell.
Vendimi i guvernatores erdhi pas publikimit të të dhënave të reja dhe mesazheve telefonike që ngritën pikëpyetje të mëdha mbi mënyrën se si policia lokale dhe zyra e prokurorit të rrethit trajtuan hetimin fillestar të një përdhunimi në grup në godinën e një vëllazërie studentore (Chi Phi fraternity).
Informacionet e reja që tronditën opinionin publik
Ngjarja daton në vitin 2024, kur një studente 20-vjeçare denoncoi se i kishin dhënë lëndë narkotike dhe alkool përpara se të dhunohej seksualisht. Çështja më pas u mbyll pa akuza.
Por ditët e fundit u bënë publike komunikime me mesazhe dhe biseda në rrjete sociale ku anëtarët e vëllazërisë diskutonin për ngjarjen, çka nxiti reagime të ashpra qytetare dhe politike mbi neglizhimin e provave nga hetuesit vendorë.
”Informacionet e fundit të bëra publike ngrenë pyetje mjaft serioze mbi mënyrën se si u trajtua ky rast në hapat e tij të parë,” deklaroi Guvernatorja Hochul gjatë njoftimit të urdhrit ekzekutiv, duke theksuar se opinioni publik dhe viktima meritojnë transparencë të plotë dhe drejtësi pa paragjykime.
Me marrjen e çështjes nga Prokurorja e Përgjithshme e Nju Jorkut, do të rishqyrtohen të gjitha provat materiale, komunikimet digjitale dhe dëshmitë e mbledhura.
Vetë Universiteti Cornell, nën presionin e opinionit publik, njoftoi se ka angazhuar juristë të jashtëm për të hetuar mënyrën se si administrata e vet e menaxhoi denoncimin e studentes.
Rasti ka rikthyer në vëmendje edhe diskutimin mbi zbrazëtirat ligjore (loopholes) në ligjet e shtetit të Nju Jorkut sa i përket sulmeve seksuale ku viktimat janë në gjendje të paaftë për të dhënë pëlqim për shkak të dehjes apo lëndëve narkotike.
m.a. / dita
