Prokurori i SPAK Vladimir Mara ka dhënë detaje në lidhje me operacionin e SPAK të koduar “Coast to Coast”, ku janë lëshuar 21 urdhër-arreste. Është bërë me dije se vlera e drogës së sekuestruar ka qenë 2.7 milionë euro.
SPAK ka ofruar gjithashtu dhe pamje nga operacioni ku u shkatërrua grupi kriminal për trafikimin e lëndëve narkotike me episode nga Siria në Shqipëri, nga Turqia në Shqipëri, nga Shqipëria-Itali etj.
Mes 20 personave të arrestuar për trafikun e lëndëve narkotike nga Siria drejt Shqipërisë dhe vendeve të BE-së, është edhe një efektiv i policisë. Bëhet fjalë për Marash Gjonin polic i kufirit në Shkodër i cili dyshohet se është korruptuar nga anëtarët e grupit kriminal gjatë transportit të një sasie të lëndëve narkotike.
Arrestimet e bëra lidhen me sekuestrime të lëndëve narkotike të sekuestruara më herët, atë të vitit 2021 në Durrës ku u sekuestruan 30 kg kanabis në formë çokollate ku u arrestua kreu i grupit kriminal Endrit Bakiu dhe Fadjon Çami.
Gjatë të njëjtit vit, janë sekuestruar 15 kg heroinë në Kakavijë, 17 kg heroinë në Shkodër, 14 kg kokainë në Shkodër, 65 kg kanabis në Maqedoni të Veriut dhe 21 kg kokainë në Milano të Italisë.
