Ndarja e Pique nga Shakira vazhdon të prodhojë lajme në shtypin rozë. Mësohet se ish-futbollisti i Barcelonës është përplasur me vëllanë e këngëtares, në Shtetet e Bashkuara të Amerikës, ndoshta edhe për shkak të kujdestarisë së dy djemve. Gjithçka ka ndodhur në Miami, siç raportohet nga programi televiziv “La Mesa Caliente”, në kanalin ‘Telemundo’.
Pique udhëtoi në qytetin e Amerikës së Veriut këtë të mërkurë, për të parë fëmijët e tij. Por ribashkimi me kolumbianen duket se ka shkuar keq dhe mes të dyve nisi një debat i shëmtuar, dëshmitar i të cilit ishte vëllai i artistes, Tonino Mebarak, i cili doli në mbrojtje të motrës së tij dhe u përplas fizikisht me ish-lojtarin. Sherri ka përfunduar me ndërhyrjen e forcave të sigurisë, që ndodheshin aty pranë.
