Përmbytjet nga moti i keq: Pezullohet mësimi në 14 shkolla në Shkodër, bie niveli i lumit Ishëm, evakuohen 26 familje

Shqipëria zgjohet sot një ditë pas përmbytjeve masive. Situata duket e qetë në orët e para të mëngjesit.

Majat e maleve janë mbuluar me borë. Sot Maja e malit të Gjallicës, Koretnikut dhe bjeshkët e larta malore janë zbardhur nga dëbora. Rrugët nacionale janë të qarkullueshme normalisht.

Gjatë mbrëmjes ka pasur rënie inertesh dhe gurësh si dhe bllokime të kanaleve shkarkuese.

Bashkia Tropojë po punon për hapjen e rrugëve të dëmtuara, apo aty ku ka pasur rrëshqitje dherash.

Pas reshjeve të dendura dhe përmbytjeve që i shoqëruan, ndalimi i reshjeve gjatë natës ka bërë që niveli i lumit Ishëm të bjerë. Edhe niveli i ujit nëpër ara të bjerë, por ende vijon të ketë rreth 30 cm ujë akoma në to. Rruga e bllokuar e fshatit Mirqine është e kalueshme me mjete, por jo nga këmbësorët.

Ministrja e Arsimit dhe Sportit ka vendosur pezullimin e mësimit në 14 shkolla në zonën e Shkodrës, për shkak të vështirësive të krijuara nga përmbytjet masive. Në njoftimin e lëshuar dje nga Ministria, thuhet se “në Ministrinë e Arsimit, së bashku me grupin drejtues për përballimin e situatës së shkaktuar nga reshjet, rivlerësuam kushtet e shkollave dhe mundësitë për rifillimin e procesit mësimor. Në 14 shkolla ku mësojnë 210 nxënës, mësimi do të pezullohet dhe do të zëvendësohet në ditët në vijim.

Bashkia Shkodër ka nxjerrë bilancin e përditësuar nga përmbytjet, ku thekson se sipërfaqja totale e përmbytur është 1685 Ha.

Njoftimi i Bashkisë:

Sipas të dhënave të fundit nga Qendra Kombëtare Operacionale e Emergjencave Civile në Agjencinë e Mbrojtjes Civile gjatë orëve të fundit ka patur një përmirsim të situatës së krijuar nga reshjet në Shkodër. Nga 2425 Ha sipërfaqe e përmbytur dje, sot rezulton vetëm 1685 Ha, 26 familje të evakuuara dhe 5 shtëpi me prezencë uji.

Nga monitorimi në terren ditën e sotme datë 22.11.2022,ora 08.00, situata e përmbytjeve në terren vazhdon të jetë si më poshtë:

• Hidrometri i Liqenit të Shkodrës në orën 08.00,shënon kuotën 7.67 m.(Kuota max 8.70 m).

• Hidrometri i lumit Drin në orën 08.00,shënon kuotën 5.90m. (Kuota max 7.50 m).

Bashkia Shkodër

Siperfaqe totale e përmbytur 1685Ha

Nj.A. Ana e Malit

1. Sipërfaqja e tokës bujqësore e përmbytur vlerësohet në 900 Ha, kryesisht në fshatrat Obot, Muriqan,Oblikë

2. Rruga e Obotit – Niveli i ujit mbi rrugë arrin rreth 40 cm.

3. Ujësjellësi Oblika 1,si pasojë e përmbytjeve është jasht funksionit

 Nj.A Dajç

1.Sipërfaqja e tokës bujqësore e përmbytur vlerësohet në 150 Ha, kryesisht në fshatrat Mushan, Shirq, Pentar.

2. Rruga Darragjat-Shirq në vendin e quajtur Urrelat e Shirqit ka mbi 15cm ujë

Nj.A.Velipojë

Sipërfaqja e tokës bujqësore e përmbytur vlerësohet në 135 Ha.kryesisht fshatrat Baks, Luarz. Ças.

Nj. A. Guri i Zi

Sipërfaqja e tokës bujqësore e përmbytur vlerësohet në 300 Ha, kryesisht në fshatrat Kuç dhe Rrenc.

Nj.A.Bërdicë

Sipërfaqja e tokës bujqësore e përmbytur vlerësohet në 200 Ha, konkretesht në fshtrat Trush,Berdicë e Siperme, Berdice e Mesme, Beltoje.

Familje të evakuara:

Janë 26 familje të evakuara, gjithsej 99 persona, kryesisht nga Njësitë Administrative :

Nj. Administrative Guri I Zi, 19 familje (77 persona), po evakuohen 30 krerë gjë e gjallë,të imta.

Nj. Administrative Bërdicë, 2 familje (8 persona)

Lagja Nr.4,  3 familje (7 persona)

Lagja nr. 1,  2 familje ( 7 persona)

Të akomoduar në konvikt 3 familje ( 12 persona), ndërsa pjësa tjetër tek të afërmit.

Shtëpi me prezencë uji në oborre dhe në brendësi të banesave gjithsej 5 banesa:

tek Lagja Nr.4, 5 banesa (Ajasem)

j.l./ dita