Debati për reformën territoriale është shoqëruar me përplasje të forta politike në Komisionin e Ligjeve, pas lajmit për vendosjen e masës së “arrestit shtëpiak” nga SPAK ndaj kreut të Shërbimit Informativ të Shtetit, Vlora Hyseni.
Deputeti i Partisë Demokratike, Oerd Bylykbashi, kërkoi mbledhjen e Kuvendit për të diskutuar situatën e krijuar, duke argumentuar se zhvillimi prek drejtpërdrejt sigurinë kombëtare dhe kërkon një reagim institucional nga Parlamenti.
“Parlamenti duhet të mblidhet pas arrestimit të kreut të SHISH”, deklaroi Bylykbashi, duke e cilësuar situatën si tepër të rëndë. Në vijim, ai kritikoi institucionet shtetërore, duke deklaruar se “janë infektuar të gjitha qelizat e shtetit” dhe se “shteti është i krimbur”.
Nga mazhoranca, kryetari i Komisionit të Ligjeve, Ulsi Manja, kërkoi vijimin e mbledhjes sipas rendit të ditës dhe shqyrtimin e projektligjit për reformën territoriale.
“Duhet të ecim me rendin e ditës. Projektligji është i rëndësishëm”, u shpreh Manja. Ai theksoi gjithashtu se veprimet e SPAK janë pjesë e funksionimit të institucioneve në një shtet demokratik.
Edhe deputeti demokrat Saimir Korreshi kundërshtoi vijimin normal të mbledhjes, duke ngritur pikëpyetje mbi prioritetet e institucioneve në kushtet e një situate që, sipas tij, lidhet me sigurinë kombëtare.
“A ka prioritete ky shtet kur bie siguria kombëtare?”, deklaroi Korreshi.
Deputeti i PD-së iu drejtua gjithashtu mazhorancës lidhur me vendndodhjen e Presidentit Bajram Begaj, duke pyetur: “Bajram Begaj, dini gjë ku është?”.
Korreshi kritikoi edhe mënyrën e trajtimit të reformës territoriale, duke pretenduar se vendimmarrja për të ishte bërë më herët dhe se diskutimi në Komision ishte i panevojshëm.
“Ju keni vendosur për territorialen, na e sillni këtu kot”, tha ai.
Duke iu rikthyer masës së vendosur ndaj kreut të SHISH, Korreshi e cilësoi situatën si një zhvillim jashtëzakonisht të rëndë.
“Arresti për kreun e SHISH, ka rënë shteti sot, e dini apo jo?”, u shpreh deputeti gjatë debatit.
Mbledhja e Komisionit të Ligjeve vijoi mes përplasjeve politike, ndërsa në rendin e ditës ishte prezantimi dhe shqyrtimi i projektligjit për reformën territoriale.
j.l./ dita
Ke te drejte sepse per skenderbeun tuaje ceshtja per te vjedhure parate e radhes eshte me I rendesishem se siguria kombetare. Rrofte partia desh me thane por ato nuk e lane.