Përshkallëzohet situata në Lindjen e Mesme, Trump refuzon propozimin iranian, Teherani kërcënon sërish

Situata në Lindjen e Mesme vijon të jetë e tensionuar, ndërsa SHBA dhe Irani lëshojnë kërcënime ndaj njëri-tjetrit.

Përpjekjet për t’i dhënë fund luftës në Lindjen e Mesme mbetën në një ngërç, me Shtetet e Bashkuara skeptike ndaj një propozimi të ri nga Teherani për të hapur ngushticën e Hormuzit.

Negociatat midis Uashingtonit dhe Teheranit duket se kanë ngecur, pavarësisht një armëpushimi në fuqi për tre javët e fundit. Presidenti, Donald Trump ka paralajmëruar Iranin kundër rifillimit të operacioneve ushtarake SHBA-Izrael nëse nuk vendos me zgjuarsi për programin e tij bërthamor.

Në të njëjtën kohë, Trump tha se iranianët nuk dinë si të nënshkruajnë një marrëveshje jo-bërthamore. Ai ka refuzuar propozimin iranian, ndërsa ka deklaruar se SHBA nuk do të heqë bllokadën detare pa një marrëveshje bërthamore. Nga ana tjetër, Irani ka paralajmëruar ditën e sotme se do të ndërmerrte veprime të paprecedenta ushtarake kundër konfiskimit të vazhdueshëm nga SHBA të anijeve të lidhura me Republikën Islamike.

21 persona janë ekzekutuar dhe më shumë se 4 mijë janë arrestuar në Iran, që nga fillimi i luftës me Shtetet e Bashkuara dhe Izraelin në fund të shkurtit, sipas të dhënave të publikuara nga zyra e OKB-së për të drejtat e njeriut. Gjithashtu, dallimet politike në Iran janë përkeqësuar nga mungesa e Mojtaba Khameneit, i cili jeton në fshehtësi dhe raportohet se është i plagosur rëndë. Sipas raportimeve, ai ka kontakte minimale me zyrtarët iranianë.

Çmimet e naftës janë rritur sërisht, ndërsa konlflikti midis SHBA-së dhe Iranit vijon të jetë aktiv. Nafta e papërpunuar Brent, standardi global i naftës, është rritur me 2.3% në 113.8 dollarë për fuçi.

Mediat shkruajnë se presidenti amerikan, Donald Trump ka udhëzuar ndihmësit të përgatiten për një bllokadë të zgjatur të Iranit. Ndërkohë, ndërmjetësuesit në Pakistan presin të marrin një propozim të rishikuar nga Irani në ditët e ardhshme për t’i dhënë fund luftës.

Emiratet e Bashkuara Arabe thanë të martën se do të largohen nga Organizata e Vendeve të Naftës, një lëvizje tronditëse që mund të rrisë furnizimin global të naftës dhe të ulë çmimet në planin afatgjatë.

j.l./ dita