Tre vatra të mëdha zjarri përfshinë pasditen e së hënës zonat në afërsi të Lezhës. Një vatër zjarri u shfaq në vendin e quajtur Markatomaj, teksa flakët përfshinë të dy anët e autostradës Lezhë-Milot. Situata ishte e vështirë, ndaj dhe policia devijoi rrugën për automjetet.
Një tjetër zjarr ra në fshatin Piraj, teksa flakët dogjën edhe traversat e drurit të hekurudhës në një gjatësi prej 500 metra. Në rrezik janë dhe disa banesa në këtë fshat, pasi favorizuar nga era, flakët janë përhapur në disa drejtime.
Një tjetër vatër zjarri ra në lagjen “Nënë Tereza”, në afërsi të qytetit të Lezhës, teksa flaket përfshinë një sipërfaqe të mëdha me pisha dhe shkurre.
Një sipërfaqe e mbjellë me ullinj, dru frutore dhe drithëra në Peshtan të Fierit u përfshi gjithashtu nga flakët mesditën e së hënës. Banorët e zonës, 3 mjete zjarrfikëse të Fierit dhe gjithë efektivët e këtij reparti janë në luftë me flakët.
15 vatra të tjera zjarri u shfaqën gjatë mesditës së sotme edhe në zonën mes Plukut dhe Grabianit në Lushnje. Zjarret që gjatë kësaj periudhe përdoren nga fermerët për të djegur mbetjet e grurit të korrur dhe për të pastruar kanalet nga bimësia e egër kanë djegur edhe parcelat me të mbjella të stinës si dhe pemë të ndryshme.
Edhe në Orosh të Mirditës po luftohet për të shuar një vatër zjarri në një sipërfaqe të pyllëzuar në zonën e Oroshit.
Sipas emergjencave civile era e fortë ka rënduar situatën në fshatin Bizë, në Durrës ku është aktivizuar një vatër zjarri në një sipërfaqe pylli me pisha dhe shkurre, që ka vënë në rrezik edhe banesat.
Situatë e vështirë raportohet edhe në fshatin Juban të Shkodrës, ku gjithashtu po punohet për të shmangur zjarrin nga banesat pranë. Ministria e Mbrojtjes bëri të ditur gjatë ditës së sotme janë raportuar zjarre në 5 qarqe të vendit, Lezhë, Vlorë, Durrës, Fier e Shkodër.
a.m/dita
